24. септембра 2010 гостями Інштітуту русиньского языка і културы Пряшівской універзіты были штуденты і высокошкольскы учітелї з Універзіты Алберта Лудвіґа у Фрайбурґу (Нїмецько).
Проф. Др. Юліану Бестерс-Ділґер, Др. Ахіма Рабуса і 15 штудентів Славістічного семінаря фрайбурьской універзіты прияла директорка інштітуту, доц. ПгДр. Анна Плїшкова, ПгД., яка про них приправила лекцію на тему взнику і функціонованя русиньского варіанту списовного языка на Словеньску і іншых списовных варіантів русиньского языка (лемківского, підкарпатьского, войводиньского). Гостї з Нїмецька своє перебываня міджі карпатьскыма Русинами реалізовали в рамках 12-денного выскумного проєкту Европскы языковы і меншыновы політікы. Свій соціолінґвістічный выскум, окрем Словеньска, реалізовали в Польску, Мадярьску і на Українї.