В 5. пунктї попереднёй резолуції было вырїшено, же од 1. до 10. юла 2009 буде орґанізованый Табор русиньскых дїтей у Гончові в Польску, причім потрібно дорішыти проблем навколо ёго фінанцованя.

Члены СРР ся вернули к пункту 6 минулой резолуції, якый ся дотыкав заведжіня етноніму „Карпаторусины“ на Підкарпатю. Пересвідчіли председу, жебы при списованю жытельства на Українї в р. 2011 до списку націоналностей быв уведженый не термін „Карпаторусины“, але лем „Русины“, так як є то в іншых країнах, жебы то людей не дезорьєнтовало. Также тым ся зробила зміна в уведженім пунктї.

Приступило ся і ку „горячому проблему“ (пункту 7 попереднёй резолуції), якым є нестабілізація у членьскій орґанізації СКР – „Соймі подкарпатських русинов“, котра ся своїм політічным дїятельством сама выключіла зо Світового конґресу Русинів. Але треба конкретно написати в чім тота орґанізація і єй представитель в СРР порушыли Становы СКР, жебы то мож было предложыти 10. світовому конґресовому засїданю в Руськім Керестурї і Петровцях. Там дїло треба вырїшыти остаточно, вірьме, же ся то і стане, бо до засїданя у Пряшові предложыли свою реґістрацію і становы дві надїйны орґанізації, котры ся „політічно не скомпромітовали“ – „Закарпатське областне обєднаня громадян “ Крайове товариство подкарпатських русинів“ на челї з М. Бобинцём і „Закарпатський областний благонадійный фонд „Русинська школа“ на челї з В. Падяком. Є надїй, жебы могли як асоціація стати ся новым членом СКР за Русинів Україны. Подобно бы то могло быти і з Чехіёв, але там дїло кус інакше, покышто непереходне. Но і то конґрес буде мысіти вырїшыти.

Ясна позіція председы была што до пункту 9 резолуції, де высловив незгоду, жебы в новій СРР не быв зволеный представитель Словеньской асоціації русиньскых орґанізацій (САРО), але зась лем представитель Русиньской оброды на Словеньску (РОС). При голосованю теперь, 13. 2. 2009 тота пропозіція В. Противняка была завержена дефінітівно і векшына членів СРР голосовала за то, же далшы два рокы од 10. конґресу буде Русинів Словакії в СРР заступати представитель САРО. Уступок СРР зробила в тім, же на конґрес буде ся волити по 6 делеґатів із РОС а по 4 із САРО, же ся то не буде черяти, як то было договорено іщі перед 9. конґресом і на нїм, з чім члены САРО не можуть быти спокійны.

Термін 11. пункту резолуції быв перенесеный із 13. фебруара до 15. марца 2009, до коли кажда членьска oрґанізація мать предложыти план акцій і дїятельства перед списованём жытельства в окремых країнах в р. 2010 – 2011. Тoто дїло є єдно з найважнїшых а к даному терміну такый матеріал предложыла лем Русиньска оброда на Словеньску, котра тым може послужыти нелем прикладом, але і дакотрыма думками. (В будучім чіслї нашых новинок вам тот проґрам представиме, хоць быв уж опублікованый в „ІnfoРусинї“. Єм проти дупліцїтї нашых періодік, што знають многы, але тот документ варто опубліковати і в нашых новинках, бо при списованю жытельства на Словеньску бы мали тягати за єден конець вшыткы русиньскы орґанізації, русиньскы актівісты і вшыткы Русины, котры мають інтерес, жебы сьме пережыли як самостатный народ.)

Потім ся говорило главно о приправах 10. Світового конґресу Русинів у Руськім Керестурї в Сербії і Петровцях у Хорватії 4. – 7. юна 2009. Як нас інформовали обидвоє главны домашнї орґанізаторы Д . Папуґа зo Сербії і Н. Гнатко з Xoрватії уж на скоршім засїданю предложыли деталный проґрам, котрый ся в основі не мінить, лем ся доповнює детайлами.

Найвекшы проблемы суть з „новотов“ нашых конґресів, жебы влада даной гостюючой країны прияла в рамках конґресу посланцїв народных парламентів із тых держав, де суть членьскы орґанізації СКР, як і посланцїв Европского парламенту. Ту орґанізатзоры „зарубали высоко“, тото барз тяжко буде зреалізовати, але мало бы то вызнам: посланцї бы дістали інформації „з прямой рукы“, т. є. од самых Русинів.

Также окремы членьскы орґанізації дорослых і молодых у найблизшім часї зволять делеґатів і гостїв, котры будуть репрезентовали Русинів окремых країн на юновім СКР і Світовім форумі русиньской молодежи. Треба вірити, же выбір буде добрый, жебы делеґаты і гостї на конґресї засїдали конштруктівно і давали добры пропозіції, котры бы ся потім але і реалізовали, чім бы юбілейный конґрес ся міг стати далшым кроком допереду в русиньскім русї у oкремыx країнах і у світї вообще.