Пропозіції:

1. Кажда МО РОС выпрацує властный план подля своїх представ, котрый буде заміряный на даный реґіон. Выходиме з того, же кажда МО РОС найлїпше знать, у чім є в тім реґіоні сила, або наопак, што там треба вылїпшыти ці приспособити даній шпеціфічній сітуації. Подля такого плану, вытвореного на реґіоналнім прінціпі,  буде  кажда МО РОС  поступно орґанізовати свої  актівности, при котрых буде мати на памяти тот важный акт, котрым є  списованя жытельства.

2. Тїсно сполупрацовати із старостами сел і пріматорами міст. До комісій на списованя жытельства рекомедовати актівных членів РОС і іншых русиньскых орґанізацій. Приправити і наіншталовати пропаґачны таблы на видных місцях і брати участь в орґанізованых акціях.

3. Ословити священиків на селах, председу Общества св. Йоана Крестителя (о. Ярослав Поповець), шефредактора часопису Артос (о. Мілан Ясик) і іншых представителїв русиньскых орґанізацій і з нима коордіновати роботу так, жебы вєдно і з єднотныма замірами сьме выкрочіли за планованым цілём, якый поведе к успіху Русинів при списованю жытельства. В рамках того взаємно ся подїляти на забезпечованю пропаґачных матеріалів (плаґатів, летаків, одзнаків, календарїв і т. п.).

4. До кінця каждого року – 2009, 2010, 2011 треба выдати календарь і плаґаты із тематіков актівностей РОС і далшых русиньскых орґанізацій. Передставити наше дїятельство і роботу славных Русинів словом і фотоґрафіями, припоминаючі списованя жытельства а тым і нашу народну приналежность.

5. Выготовити і іншый пропаґачный матеріал (напр. трічка, заставкы, ербы, малы каледарикы і т. п.) окреме про каждый окрес і МО РОС. Такый матеріал  ся буде  роздавати  на масовых  акціях. На ёго забезпечіня і на комплексну пропаґацію треба глядати спонзорів.

6. Доповнити список сел, де жыють Русины і передати вшыткым русиньскым орґанізаціям. Контактовати ся із старостами і в такых селах, де жыє мала кількость Русинів, орґанізовати в них културны проґрамы.

7. Приготовити короткы проґрамы розлічных жанрів (малы сценічны формы) і выступати з нима на різных акціях по селах і містах. В рамках першого русиньского аматерьского театру КВІТ орґанізовати выступлїня там, де не мають властный колектів.

8. Кажда акція буде своїм обсягом присвячена списованю людей в р. 2011. Притім вжывати  вшыткы доступны формы, як відеотехніку, документарны філмы або дати простор фолклорным і іншым колектівам.

9. З Театром  А. Духновіча і ПУЛЬС-ом в Пряшові підписати договор о конкретній сполупраці перед каждым їх выступлїнём, предметом котрого бы была коротка ненасилна презентація Русинів як народности, історічно-штатістічны факты із  списованя людей в минулости і в сучасности.

10. Выдати централный плаґат ку зрахованю жытельста, як  і плаґат із  стишком А. Духновіча із нотами (Вручаніє), котрый быв Світовым конґресом Русинів схваленый за гімну вшыткых Русинів (Я Русин быв, єсьм і буду..). Таку пропаґацію роздати по сільскых урядах, священикам, школам в русиньскых селах і каждій русиньскій орґанізації.

11. В новинках InfoРусин завести од януара 2009 рубріку з назвов „Списованя людей“, або дашто подобне. Дати в них простор чітателям, жебы писали до той рубрікы інформації або статї із свого реґіону.  Найлїпшы статї потім оцінити. 

12. Ословити успішных русиньскых подникателїв, жебы нам помогли выдати штонайвеце пропаґачных і про каждого Русина ужыточных матеріалів, жебы каждый з них взяв покровительство над єдным пропаґачным матеріалом.

13. Залучіти до плану акцій і пропозіції далшых русиньскых орґанізацій, подавати проєкты нелем на Словеньску, але і в рамках ЕУ, жебы і такым способом забезпечіти фінанцованя пропаґачного дїятельства Русинів перед списованём людей.

14. Сістематічно орґанізовати выязды за нашыма людми із пропаґачныма акціями і  матеріалами. Пожадати Світовый конґрес Русинів, жебы фінанчно підпорив пропаґачны акції перед наступным списованём людей.

Комплексный план акцій і кроків РОС на рокы 2009 – 2011 перед списованём жытельства на Словеньску быв обговореный і схваленый на засїданю ВВ РОС у Пряшові 17-го децембра 2008 р.