На тогорічнім юбілейнім конкурзї, якый увів Владимір Чема, герець Театру А. Духновіча в Пряшові, а позад нёго прочітала стишок Марія Ґірова, порота на челї з директором ТАД Маріаном Марком выслухала 61 участників у пятёх катеґоріях (правда, рахуєме міджі них і участників малых сценічных форм), якы поступно выклкиковала на сцену Анна Кузмякова, повірена шефредакторка ІnfоРусина.

Заінтересовала такзвана „нулова“ катеґорія поезії і прозы, в якій ся представили Даша Ілїшкова із Снины, Матуш Зелінка з Кошіць, Терезія Стрончекова із Свідника, Матуш Міженко, Еріка Лабашова із Шаріського Ястрабя і Анна-Марія Вархолова з Кошіць, якы были добрї підготовлены, чітали творы выразно і з добров дікціов. Дасть ся повісти, же у вшыткых катеґоріях сьме збачіли снагу добрї задекламовати. Ту ся выплатила робота главной орґанізаторкы Сілвії Лысиновой, котра мала на думцї факт, же менше даколи значіть веце. Участників было менше, як по минулы рокы, зато ся векшый акцент клав на якость. Дакотры декламаторы дуже приємно несподївали, як Матєй Тарча з Кошіць з твором І. Жака Ярь, Сімонка Чернакова з Міта під Дюмбєром із Звірячов школов З. Зелка, Домінік Гоппей із Гуменного із твором А. Духновіча Жаба, Станїслава Швабова з Кленовой з поезіов Ш. Сухого Діалоґ з доджом. Тыж бы сьме могли спомянути Тімею Гарвілову із Свідника, Вероніку Кучмашову з Кленовой і іншых, якы достойно обстали при презентації родного материньского слова. Хыбила нам але розмаїтость авторів, также ся стало, же дакотры творы ся повторёвали ай трираз, што было на укор якости. Думаме сі, же є дость доброй літературы на декламацію, яка вышла в послїднїх роках у выдавательствах Русиньской оброды або Русина і Народных новинок – в персоналных або колектівных зборниках, антолоґіях. А кідь того є мало, треба сягнути до класікы або черьпати і з перекладовой літературы. Тото може лем посилнити такый престижный конкурз, якым є Духновічів Пряшів, єдиный своёй сорты, на якім ся уж десять років презентує аматорьске декламаторьске майстровство Русинів на Словакії. А што ся тыкать аналізы выступлїнь окремых декламаторів, зышов бы ся в рамках конкурзу семінарь, якый бы поміг орьєновати ся участникам, враховано учітелїв русиньского языка, в сучасных трендах літературы, драматічного, ці декламаторьского уменя.

На Духновічовім Пряшові были представлены і малы сценічны формы. Попозерали сьме приповідку О Шіпковій Руженцї автора О. Вархолика в інтерпретації школярїв з ОШ в Колбівцях, де ся учіть русиньскый язык. Із Шаріського Ястрабя колектів Сонечко указав Снїгурку (авт. і режія В. Сопкова), яка наставила дзеркало сучасным проблемам молодежи. Найдале у своїм артістічнім майстровстві пішов Михал Пірник із Пряшова, готовый то герець, якый ся представив з моносценков Алжбеты Верешпеёвой.

Прємно конштатовати, же на сценї ся презентовала і властна творивость. Свою прозу задекламовала Крістіна Березнянинова з Ублї, поезію Анна-Марія Ґніпова з Пчолиного і Квета Галасова з Новых Замків. Послїдня з них ся публікує під меном Квета Мороховічова-Цвик на сторінках Русина і Народных новинок.

Не хыбовав вже традічно на Духновічовім Пряшові Ерік Ґунар із Пріватной ґімназії із Снины, якый декламовав стишок А. Павловіча Горы, горы зелененькы. Він ся став ай лавретом 10. річника Духновічового Пряшова. Ціну 100 евр му передала в менї пріматора Пряшова ПгДр. Анна Бемерова, ведуча Школьского уряду міста Пряшова.

Выслїдкы 10. річника конкурзу Духновічів Пряшів – 2009

0. катеґорія – поезія:

1. Даша Ілїшкова, МШ Снина (выступила з віршом Ш. Сухого: Руснак і граблї)

1. Матуш Міженко, Шар. Ястрабє (Ш. Сухый: Стоморквовый снїгуляк)

2. Матуш Зелінка, Кошыцї (О. Кудзей: Манажер)

2. Терезія Стрончекова, ЦОШ св. Юрія, Свідник (Ш. Сухый: Што оцінкы гварять)

3. Анна-Марія Вархолова, Кошыцї (О. Кудзей: Самохвала)

0. катеґорія – народне росповіданя:

1. Еріка Лабашова, Шар. Ястрабє (Драга до Пряшова)

I. катеґорія – поезія:

1. Матєй Тарча, Кошыцї (І. Жак: Ярь)

2. Якуб Зелінка, Кошыцї (О. Кудзей: Силацькы речі)

3. Марош Гомза, ЦОШ св. Юрія, Свідник (Ш. Сухый: Школярёва молитва)

I. катеґорія – проза:

1. Сімона Чернакова, Міто под Дюмбєром (З. Зелк: Звіряча школа)

II. катеґорія – малы сценічны формы:

ОШ Колбівцї – Приповідка О Шіпковій Руженцї (Ціна за презентацію русиньского слова)

II. катеґорія – поезія:

1. Станїслава Швабова, ОШ Кленова (Ш. Сухый: Діалоґ із доджом)

1. Домінік Гоппей, ОШ Гуменне  (А. Духновіч: Жаба)

2. Бянка Саґанова, Споєна школа Свідник (Н. Гвозда: Співайте собі, дївчата)

3. Антонія Сташова, ОШ Колбівцї  (О. Кудзей: Колеґове)

II. катеґорія – проза:

1. Тімеа Гарвілова, Споєна школа Свідник (Ш. Смолей: Чія правда)

2. Крістіна Пелёва, ОШ Стащін (Статочный Русин – русиньска народна повість)

3. Моніка Міхалкова, ЦОШ св. Юрія, Свідник (Ш. Сухый: Кідь ся ті на біду оберне)

ІІІ. катеґорія – фіґлї:

2. Емілія Плавчанова, Шарішске Ястрабє

ІІІ. катеґорія – поезія:

1. Івета Ігнаткова, Убля (Ш. Смолей: Нелегка выгварка)

2. Моніка Зрібкова, Споєна школа Свідник (О. Кудзей: Жаборины)

2. Марія Хамілова, Шар. Ястрабє (О. Кудзей: Овад і худоба)

3. Татяна Ванчікова, Бардеёв (О. Кудзей: Овад і худоба)

3. Мірослава Танчакова, Пчолине (О. Кудзей: Овад і худоба)

III. катеґорія – малы сценічны формы:

1. Михал Пірник, Пряшів – сценка

2. Шарішске Ястрабє, Сонечко (Снїгурка, авт., реж. – В. Сопкова (діплом і ціна за обявность темы)

ІІІ. катеґорія – проза:

1. Вероніка Кучмашова, Кленова (М. Мальцовска: Поточінка)

2. Вікторія Родакова, Бардеёв (М. Ксеняк: Обаламутив шандарїв)

2. Любіца Мудзова, Пчолине (І. Кліма: Смутный крокоділ)

3. Людмила Петрікова, Шарішске Ястрабє (Ш. Смолей: Юркова стовка)

3. Крістіна Юркова, Споєна школа Свідник (Як качмар купив двадцять і пять буків – буковиньска приповідка)

ІІІ. катеґорія – властна творчость:

1. Крістіна Березнянинова, Убля

1. Анна-Марія Ґніпова, ОШ Пчолине

IV. катеґорія – поезія:

1. Ерік Ґунар, Пріватна ґімназія в Снинї (А. Павловіч: Горы, горы зелененькы)

V. катеґорія (дорослы) – властна творчость:

1. Квета Галасова, Новы Замкы