Як член Выбору про народносттны меншыны Рады влады СР про народностны меншыны і етнічны ґрупы планую скликати представителїв русиньскых обчаньскых здружінь Словакії і найти пункты взаёмной сполупраці. На першім місцї є узнаня за самостатну русиньску народностну меншыну на Українї, на другім місцї є школьска проблематіка а на третїм буде новинарьска етіка в русиньскій пресї, бо ся порушує медіалный закон в дакотрых русиньскых медіях. О своїм намірїню єм уж часточно інформовав свого колеґу зо споминаного выбору Яна Липиньского а він з моёв пропозіціов быв согласный. Не можеме так дале робити, як теперь робиме: зістав уж лем інтерес о штатны пінязї, про бізніс окремых особ, многы ся снажать выбабрати з колеґами, жебы самы дістали їх штатну дотацію. А інтерес о узнаня русиньской народности з боку влады і парламенту Україны і далшы проблемы зіставають заперти якбы в даякій клїтцї. Наконець выйдеме на сміх, як теперь вышли Ромове про свою внуторну особну незнашанливость.

Што ся стало на 11. засїданю СКР у Мадярьску односно архіву СРР?  Нa 3. засїданю Світовой рады Русинів у Празї  в днях  27. –  28. 2. 2010  было уложено втогдышнёму выконному секретарёви СРР А. Зозулякови передати матеріалы СРР до Музею русиньской културы в Пряшові, што він і зробив і поважує свою задачу за сповнену, а на 11. засїданю СКР в Мадярьску ся в резолуції з нёго жадать, жебы матеріалы передав В. Противнякови і публічно ся выгражають А. Зозулякови, же кідь то так не буде зроблено до 20. юла 2011, дадуть жалобу на нёго прокураторови. Ту нам не є ясне, же як є можне, же В. Противняк, котрый заступує нелем Русинів Словеньска в СРР, але є і ёго выконным таёмником, не знать ніч о резолуції в Празї? А хто ю властно написав? Або не хоче ніч о ній знати? Што робить В. Противняк на засїданях СРР, же не знать, што ся на засїданях СРР діє, што спить там? Я собі думам, же кідь скуточнї дакому требало матеріалы так, як то презентовав М. Кереканіч у своїм выступлїню на конґресї, та бы ся глядали способы на здобытя їх копій із музею в Пряшові, в згодї, як є уведжено в резолуції приятїй у Празї, не є в тім жадный проблем. М. Кереканіч не потребовав з архіву СРР потверджіня о своїх зарібках, або іншых особ, бо в тім часї СКР не діставав жадны дотації і никого не выплачав, окрем выданя шестёх книжок із штатной дотації. Также пан Кереканіч кламав, кідь твердив, же ёму або дакому іншому треба потверджіня од СРР о зарібках про данёвый уряд. Чом нас кламав? Вызерать так, же ту іде о умело выроблену копромітацію особы А. Зозуляка. Треба решпектовати першу прияту резолуцію в Празї, аж наслїдно мож прияти далшу позіцію, кідь будеме выходити з резолуції в Празї. Также треба поступати справедливо і подля літеры закона. Але єдно і друге на 11. засїданю СКР было зневажене, цїлено, або з незналости?! Вызерать так, же ся веде в Русиньскій обродї на Словеньску з боку сучасного секретаря В. Противняка і М. Кереканіча, ці з боку СРР, або з боку СКР незаконна коншпірація проти особі бывшого секретаря СРР А. Зозуляка, што ся дасть зажаловати на Окреснім судї в Пряшові на основі Закона о охранї особности. Або права рука СРР не знать, што робить лїва? Панове у Світовій радї Русинів, дайте головы докопы і роздумуйте, што всластно хочете робити, бо шкандалізованя людей і публічны грозьбы судами, ганоблїня доброго мена жытеля Словеньской републікы без доказаня вины не є посланём СРР, ани засїдань СКР!

Є смутно, же о судьбі Русинів на Українї на 11. засїданю СКР ся ніч не говорило, не нашов ся простор, ани ся не прияла нияка резолуція у смыслї забеспечіня узнаня русиньской народности на Українї. Але на неприятя Русинів Росії за члена Конґресу, на вылучіня Підкарпатьского областного благонадійного фонду „Русинська школа“ на Українї з членства у Світовім конґресї Русинів, што є фактічно ліквідація русиньского школства на Підкарпатю, як і на діскредітацію жытеля Словакії А. Зозуляка ся на тім засїданю простор нашов. To є велика ганьба представителїв СРР на челї з председом Дюром Папуґом зо Сербії. Такы актівности спохыбнюють добросердечность і благородность у роботї СРР і СКР. То не є на хосен русиньского народного возроджіня, але наспак – нехосенность. Треба ся нам у Словакії важно задумати над тым, што ся властно у нашых русиньскых найвысшых орґаных робить. А скуточнї там маме особы заслужуючіх собі довіря вшыткых Русинів у світї і якы добре репрезентують нас Русинів?!  Ці скуточнї така орґанізація, як є СКР на челї зо СРР є морално чіста і ці можеме быти согласны з тым. жебы собі заслужыла зареґістровати новый Штатут СКР на Міністерстві внутра СР?! Мам пропозіцію, же тот штатут най ся зареґіструє даґде інде, наприклад, в Румунії. Я як член Выбору про народностны меншыны Рады влады СР ся буду з тым проблемом занимати, жебы сьме, не дай Боже, не дали зареґістровати даякый Штатут СКР протирусиньскый і протигуманный, подля котрого бы ёго члены лем паразітовали на штатных фінанчных дотаціях на Словакії, а робили не на хосен самых Русинів на Словакії, але на хосен дакого, хто не є жытелём Словацькой републікы. Треба нам з того проблему глядати выход, жебы сьме публічно не діскредітовали і дескріміновали людей на засїданях СКР і СРР. То є далшый із доказів того, же тота русиньска платформа ся уж публічно натілько скомпромітовала, же є на часї, жебы морално чісты люде, Русины, роздумовали о заложіню другой світовой платформы Русинів. 

На конець публікуєме ниже на порівнаня пункт із резолуції делеґатів 11. засїданя СКР у Пілішсенткерестї 16. – 18. юна 2011 з пунктом резолуції СРР із 3. засїданя СРР у Празї 27. – 28. фебруара 2010:

„Ґ. ХІ СКР укладать:

… 3 в) Передати бывшым тайомником СРР Алаксандром Зозуляком комплетну фінанчну аґенду (веджену до 5. 6. 2009) теперішньому тайомникові СРР Владимірові Противнякові в тернімі до 20-го 7. 2011 р. В іншому выпадку буде несповніня в терміні обсягу задачі в оглядане як порушіня узнесінь і Штатуту СКР, фінанчных законів, і наслідні передане на рішіня прокуратурі.

                                                                          Т: 20. 07. 2011  З: председа СРР

Резолуцію была схвалена делеґатами 11. Світового конґресу Русинів у Піліссзенткересзті в Мадярьску дня 18-го 6. 2011 р.

Підписаны за пропозіційну комісію:

Мірон Крайковіч, председа комісії

Дюра Шеповіч

і Марія Бочкор, членове комісі.“

„Пункт 9. Пропозіція на штатут архіву СКР

Світова рада Русинів проїднала вопрос архіву Світового конґресу, котрый од 1991 року находить ся у бывшого тайомника СРР Александра Зозуляка і становила слідуюче:

Штатут архіву СКР

1/ Архів СКР ся складать з писомности, записів, корешпонденції, писем, ціных листів орігінілів, дарів, грамот

2/  СРР схвалює передати архівы до архівной інштітуції Музея русиньской културы в Пряшові через сучасного тайомника СРР

3/   Шыткы  документы / р. 1991 – 2009 / будуть зоряджены подля архівного порядку по роках

4/  Властник документів Світовый конґрес Русинів выпрацує догоду з музеём о звіреных архівных  документох  і  подмінкы што до доступу до архіву теперь і в будучности.

5/  На основі списаной догоды міджі СКР а Музейом русиньской културы в Пряшові, буде агенда одовздана  председом СРР і тайомником СРР до архіву.

6/  Приступ до документів СКР схвалює председа СРР писомні через тайомника СРР, в його непритомности підпредседа СРР

7/  Выдане дозволіня до архіву огранічує котрых документів ся тыкать і на якый час.

8/  Під цілый час приступу і нагляданю до документів є притомный одповідный працовник МРК  і тот забезпечує копії документів

9/  Каждый приступ  окрім членів СРР а РР СКР є споплатненый сумов /5 єуро. Копірованя документів є можне лем із дозволіньом председу СРР за поплаток /1 єуро лист./

10/ Документы суть маєтком СКР а може быти властником з нима накладане подля розгоднутя СРР / запожычаня на выставы, штудійны роботы, публічне спрацованя і т. п. /

11/ Інше отворяня архіву СКР є заказане з боку архівной інштітуції Музея русиньской културы в Пряшові

12/  Грошы отримани за поплаткы зоствавють в покладні МРК.

Світова рада Русинів схвалила условія платны про Штатут архіву СКР на засідані СРР в Прагі дня  28. 2. 2010

Узнесіня 24 :

Проïднати уложіня архіву СКР з діректорков Музея русиньской културы в Пряшові і условія платны про Штатут архіву СКР схвалены Світовов радов  Русинів. По  ïх акцептованю приступити до архіваціï.

                                                                  Термін:  до  1. 05. 2010          

                                                                  Одповідны:  тайомник і председа  СРР.“

Ян КАЛИНЯК, Свідник, делеґат 11. засїданя СКР за САРО