Славный памятник перед арлінґтоньскым цінтерём в штатї Вірджінія, на єдній із скулптур котрого є і М. Стренк. Ґрупова скулптура памятника взникла на основі славной фотоґрафії покладеня америцькой заставы на верьху горы Сурібачі острова Іво Джіма 19. фебруара 1945. В бої на тім острові загынув М. Стренк 1. марца 1945.

Неясности ся проявили і в одношіню до Михала Стренка. В книзї і філмі Заставы нашых отцїв (Flags of Our Fathers) є Стренк неправилно означеный як Чех, а в недавных споминанях на нёго у пресї зась є выголошеный за Словака. І кідь ёго родина еміґровала із Чеськословеньска і ёго родне село Орябина ся находить на теріторії Словеньской републікы, о Стренковім русиньскім походжіню і нацоіоналній принадлежности не є похыбностей.  В приглашцї ку штатному обчанству, котру ёго родічі выповнили в Кембрійскім реґіонї Пенсілванії, увели русиньску народность.

Хоць Стренк ся став обчаном США в роцї 1935, кідь было обчанство узнане ёго отцёви, він сам ниґда не дістав такый документ. Аж донедавна ёго бывшый наморный корпус не знав, же Стренк быв іміґрантом. Сержант у канонїрів Мет Блейс, котрый теперь робить як наморный безпечностный стражця Америцькой амбасады на Словеньску пришов на то, же Стренк не быв америцькым обчаном народженым у Споєных штатах америцькых і пожадав Америцькый іміґрачный уряд в Стренковім менї о узнаня штатного обчанства по ёго смерти.

Почас святочного церемоніалу перед памятником, на котрім є і М. Стренк, председа Іміґрачного уряду США Йонатан Шарфен підкреслив, же Стренків припад є прикладом того, як іміґранты приспіли до історії Споєных штатів америцькых.

Карпаторусиньске общество в США вітать переданя америцького обчанства М. Стренкови і кланять ся перед ёго жертвов, і тыж вшыткых тых мужів і жен русиньского походжіня, котры были і суть в службах США.

 (Позн. ред.: Михал Стренк загынув у бої на острові Іво Джіма 1. марца 1945, нецілы два тижднї по покладеню америцькой заставы 19. фебрура 1945 на верьху Сурібачі того острова, де была зроблена леґендарна фотоґрафія Джоа Розентала, котра є найрепродукованїшов фотоґрафіёв на світї і подля котрой была зроблена знама ґрупова скулптура-памятник.)

О Карпаторусиньскім обществі в США

Гріб Михала Стренка.

Карпаторусиньске общество в США є незіскова орґанізація, задачов котрой є обознамлёваня (нелем) Русинів о русиньскій історії і културї, як і підпора русиньской културы в русиньскій домовинї у Середнїй і Выходній Европі.

Тота орґанізація має высше 1 800 членів по цілім світї, котры єй діятельство підпорують членьскым, як і добровольныма фінанчныма дарами до фондів підпоруючіх розвой русиньской културы в загранічу і гуманітарну поміч про русиньскы комуніты в Европі.