Также коротко повіджено: тогорічный пряшівскый концерт А. Сервіцькой быв пестрый а сама наша популарна співачка в нїм ексцеловала, кідь векшынов співала прекрасны, задушевны русиньскы співанкы, котры мусили каждого взяти за сердце. Также тот мішунґ єй в тім припадї мож одпустити. Окрем нёй, на концертї выступили дїтьскый фоклорный колектів Язіерко і музична співацька ґрупа Язеро з Рошковян (многы отцёве і дїдове тых меншых із дїтьского колектіву), першы мали милый выступ і добрї доповнёвали дакотры співанкы А. Сервіцькой, хлопи указали тоту середину. Збогатив проґрам своїм выступінём знамый грач на устну гармоніку Любомір Варіньскый, темпереметны танцї фолклорного колектіву Раславічан із Раславіць в допроводї гры народной музикы під веджінём віртуозного прімаша Станїслава Балажа. Єдиным русиньскым репрезентантом, окрем Сервіцькой, у тім проґрамі было знаме гуменьске тріо Іван Мигаліч, Осиф Овшяник і Михал Сійка, котрe але веце заспівалo україньскых як русиньскых співанок, хоць тоты україньскы задушевны ся нам барз любили. Выступила мімо проґраму іщі єдна словеньска співачка, котра заспівала єдну чеську співанку в допроводї ґітарісты, але тот выступ в тім концертї быв ани пришыти, ани приплатати. Вшыткых в салї розвеселёвав своїма выступами і актуалныма коментарями в ролї Циґанкы Йожко-Йожка Йозеф Варґа з Ганушовець над Топлёв, але вірю, же нелем міджі Словаками ся найде такый народный росповідач, але і міджі Русинами, може, на наступнім концертї буде даный простор, наприклад, такій Русинцї, як Емі Лакатовій із Пыхонь (окр. Снина), котра тыж выступать в ролї Циґанкы. Найвеце несподїваным, але і наконець бравурным было сполочне выступлїня Анны Сервіцькой з народнов музиков Конябой із Вішкова на Мораві, хоць на зачатку, кідь тота ґрупа спустила свою модерну музику, та каждый ся зазвідовав: Та тоты што ту роблять, нияк ту не пасують. Але по їх особнім вступі, котрый бы єм выпустив быти режісером, пришли модерны управы співанок Анны Сервіцькой, а то уж было дашто інше, нове, несподїване, красне. А кідь
окрем хлопцїв іщі заспівала красным голосом їх соліст-ка Жанета Шанова Крячок ляліовый і іншы співанкы, красно по русиньскы, были сьме вшыткы шокованы. А кідь ся ку ґрупі придала і Аня, то сьме зажывали готове чудо, прекрасна то была сполупраца, несподїване закінчіня концерту, котре цалком стерло попереднї меншы мінусы. На самый конець з ґрупов собі заспівала іщі і модераторка концерту, Русинка Жанета Лішівкова, котра свою модераторьску роботу одвела по русиньскы і словеньскы добрї.

Концерт співанок А. Сервіцькой мав дві части: духовну і світьску, в першій заспівала прекрасны русиньскы маріаньскы співы, в другій тоты найзнамішы єй русиньскы і може єдну-дві шаріськы народны співанкы. Заморозкы по тїлї каждому наскочіли, кідь собі клякла А. Сервіцька і співала ку Богородіцї і тыж кідь на колїнах ся к нїй придала модераторка. За сердце хватало і то, кідь ціла сала встала і вєдно з нашов знамов інтерпретков маріаньскых співанок ся помолила Отче наш.

Наконець треба повісти, же каждый собі на концертї нашов дашто сердцю близке, хоць не вшытко ся му мусило любити, але як то звыкне быти, каждому не вылагоїш. Но цілковый ефект з концерту быв ексцелентный і вшыткы одходили домів спокійны, тїшачі ся на девятый концерт Анны Сервіцькой у тім театрї о рік-два. Але вшыткы іщі не пішли такой домів, бо многы потім взяли участь на святочній рецепції, котру одкрыла ведуча одбору културы Пряшівского самосправного края Ева Арваёва, котра за прекрасный концерт і добру културну репрезентацію міста і краю А. Сервіцькій за вшыткых подяковала. А потім вшыткы стали до шору із букетами квіток і ґратулації не мали кінця-краю. Так як і приємна бісїда при погарї вина і смачных лакотинках. Также: БРАВО, АНЯ!