СВЯТКОВАНЯ... АКТУ АНЕКСІЇ?

Выход з даной сітуації лем єден – Косовскый сценарь!

1.  Закарпатя ся мусить стати суверенным штатом.

2.  Мусить мати демократічну самосправу.

3.  Властну Уставу.

4.  Заставу.

5.  Гімну.

6.  Право підписовати міджінародны договоры.

7.  Вступати до міджінародных орґанізацій.

8.  Быти членом Орґанізації споєных народів.

9.  Не може быти роздїлене ани Мадярами, ани Галичанами, ани Словаками, ани Румунами.

10.       Не може ся стати частёв другого штату.

(Позн. А. З.: І тоты жаданя не суть лланы, але нереалны, но з далшым тяжко мож быти согласным.)

11.       Право на обмеджене обчанство мать корїнне жытельство і особы звязаны вінчанков.

(Позн. А. З.: Тот пункт є начісто расістічного характеру, то уж ту было, наприклад, в націстічнім Нїмецьку...“)

12.       Представителї Мадярів, Румунів і другых народностей мають мати своїх представителїв у владї і штатных інштітуціях.

13.       Мать мати властну армаду і міліцію.

14.       Сувереніту з адекватнов воєньсков і обчаньсков контролёв.

15.       Мати незалежный судный сістем.

16.       Контролёвати дотримованя тых ґаранцій і вшыткых пунктів мусять міджінародны обчаньскы представителї (шпеціалный представитель Европской унії так само).

17.       Право ануловати містны законы, котры протиречать Плану управ (неакцептуючіх договоры).

18.       Місія Европской унії на контролю роботы правоохранюючіх орґанів, цолнїць і цїлкового сполоченьского порядку.

19.       Продовжена воєньска місія сил КФОР, котра буде установлена на основі мандату ОСН. В ролї міджінародных позорователїв і сил КФОР Русины жадають жебы были представителї Росії а може і Ґерманії.

Є потребне поставити Велику Карпатьску стїну по лінії граніць бывшого Чесько-словенська і Польска, по Карпатьскім хребтї. Европска унія то підтримать.

(Позн. А. З.: Скады авторы тых документів зо „Сойму Подкарпатських Русинов“ мають такы інформації?! Што авторы тых рядків хотять будовати „новый чіньскый“ або „берліньскый“ мур?!. Перед кым ся хотять хранити Русины із Підкарпатя, а, може, не они, але Росія од сил НАТО?! Ту як бы было чути московскый, а не підкарпатьскый сценарь?! Преамбула, Декларація і Додаток як єдно цїле мать 16 сторінок, также не мож вшытко публіковати, а ани не треба. На конець хочу увести лем пару „перел“. Также іщі на конець зацітую із 11. сторінкы думкы начісто расістічного, фашістічного характеру. Ці то собі наісто желать русинськый народ на Підкарпатю, або лем пару авантюрістів із сойму, котры ся выголосили за „парламент русиньского народа на Підкарпатю?!“)

... Перша етапа здобытя обчанства (Позн. А. З.: „самостатного штату Підкарпатьска Русь“) на основі роботы лустрачной комісії буде проходити двома поступами:

1) потверджінём свого корїня (мінімално 4. поколїня),

2) потверджінём нерозвиваня антирусиньского дїятельства (БЮТ, „Просвіта“, КУН і т. д.).

Необчанам буде заказано занимати ся встановленыма сортами дїятельства, а то: робити в штатній справі (Позн. А. З.: Притім авторы собі самы протиречать, бо штось інше пишуть у пунктї 12.), навчально-выховных і медициньскых інштітуціах, бізнісї, быти священиками, проповідователями. Можуть робити як домовници, старати ся о старых, хворых і інвалідів, робити як слугове і служніцї і т. д. (Позн. А. З.: Што то за псіхопатія? Хто тото в сучасности написав, мав бы ся лїчіти на псіхіатрії. Але ани там бы го не мож было пустити міджі паціентів. Што, Русины од 4. поколїня высше ся ма Підкарпатю стануть новодобыма „Übermensch“ (надлюдми)???!!!“)

Предпокладать ся, же переходный період першой етапы – то буде рік, покы основна часть обчанів перейде через лустрачны комісії. Друга етапа – зачне ся выплачованя обчанів на основі розлічных проґрамів.

(Позн. А. З.: Під Дeклараціoв ку тoму Дoдатку і Прeамбулї, котры Світова рада Русинів у своїй Позіції з 5. фебруара 2008 у Букурештї назвала як небезпечны, а то є іщі мірне слово, суть підписаны три особы: председа „Сойма Подкарпатських Русинов “, прот. Димитрій Сидор, член Світовой рады Русинів Михаіл Алмашій, секретарь сойма Димитрій Поп. Матеріал быв опублікованый на вебовій сторінцї: http://rusinpresent.narod.ru).