14. юна 2010 задали сьме єден вопрос окресному председови МOST-HÍD у Пряшові і кандідатови за тоту партію – Мґр. Петрови Крайнякови: • Як оцїнюєш успіх своёй партії МOСT-НÍD у недавных парламентных вольбах на Словеньску, хоць знаме, же на северовыходї СР, де жыють у значній мірї Русины, перевладать аверзія к Мадярам здїдена з минулых часів, а тым і к переважно мадярьскій політічній партії МOСT-HÍD, што підтвердила низка кількость голосів у Пряшівскім краю (1,7 %)?

– Так як нашы Русины могли чути і відїти, партія Мoст-Híd ся тїшыть а волебный резултат 8,12 % і 14 мандатів у парламентї є успіхом. В менї Русинів, котры были на кандідатцї нашой партії – І. Сідора, А. Джуґана, Р. Воробелёвой, Й. Ґреґоровіча, Л. Петеёвой, Ю. Цоґана – дякую вшыткым Русинам, котры волили партію Мoст-Híd. Вєдно дякуєме за преференчны голосы і надїяме ся, же за 4 рокы, так як сьме обіцяли, ся нам подарить розрушати дакотры сеґменты народного жывота Русинів. А же головна задача, котров є русиньске школство, ся буде успішно рїшати. Іщі раз высловлюю подякованя і так, як єм повів про Народны новинкы при вольбах до крайскых парламентів: „Мoст-Híd буде з Русинами думати важно до той міры, до якой ю люде підпорять у вольбах.“ Но волебный выслїдок не быв у русиньскых реґіонах такый, як бы сьме хотїли. Окрем Русинів із окремых сел і містечок, волила нас русиньска інтеліґенція, главно з Пряшова, Гуменного, Братїславы і дакотры русиньскы священици. То значіть, же маме мандат а мы маленькыма кроками будеме помагати Русинам. Тїшыме ся з того, же Мґр. Іґор Сидор, котрый є русиньского походжіня, став ся посланцём НР СР і віриме тыж, же і наш кандідат за Пряшівскый край, Інж. Андрій Джуґан, ся як наградник дістане до словеньского парламенту. То і мы му жычіме і были бы сьме рады, як бы пан Сидор у парламентї не забыв, же є Русин і жебы за Русинів ся поставив, кідь буде треба і обгаёвав їх інтересы.