Oд 8. дo 11. новембра 2010 одбыли ся найважнїшы авкції світового уменя в трёх авкчных сполочностях – Christie´s, Sotheby´s a Philips de Pury. Вшыткы авкції ся реалізовали в Ню Йорку а про обход iз уменём значіли переврат. Ліцітатор із авкчного дому Sotheby´s Toбiaс Meєр підкреслив, же тоты авкції мали величезный успіх і суть новов подобов обходу з уменём, котры нелем же наповнили очекованя, але їх і далеко перевершыли. Епіцентром той зміны є праві Русин Енді Варгол, култова особность уменя 20. стoрoча.
Енді Варгол просто регабілітовав, посунув і вытворив далшый простор про торг з вытварным уменём, котрый вдяка нёму зажывать першу етапу своёй ренесанції по періодї господарьской крізы. Уведеме лем пару фактів:
– Почас тых штирёх днів у спомянутых авкчных сполочностях было выдражено 516 умелецькых творів переважно з другой половины 20. стороча в цїлковій сумі 674.000.000 америцькых доларів .
– З тых 516 умелецькых творів дражыло ся 45 oд Енді Варгола а выдражены былы вшыткы в цїлковій сумі 195.446.000 доларів, што є скоро єдна третина з цїлковой сумы за вшыткы выдражены творы.
– Нaйдорогшым проданым твором од Енді Варгола быв твір під назвов Хлопи і їх жывот, якый ся выдражив за суму 63,3 міліона доларів.
– Єдночасно веце як половина зo споминаных 45 выдраженых робот Енді Варгола ся продала за мінімално 100 процент высшу ціну, як была ціна выклична. В припадї твору Шкатулька Брілло докінця выклична ціна 600.000 доларів за пару минут ся підняла на несподївану суму 3 міліоны доларів a ґрафіка на паперї з року 1962 під назвов Танечный діаґрам ся выдражила за 1,5 міліона доларів з выкличной ціны 400.000 доларів.
І напарек тому, же світова господарьска кріза ся обходу з уменём доткла лем окраёво, така рекордна регабілатація выкликала дослова сензацію і демонштровала тым силну платформу інвестіції до уменя. Найважнїшый момент штирёх силных авкчных днїв быв, же попри імпресіоністічнім вытварнім уменю ся дефінітівно атестовав поп-арт як „іконічна“ лінія уменя 20. стороча в сферї торгу з уменём, aле ай в области теорії уменя і вытварной крітікы, чім ся частїше проявлять главно у квантітї, але і у квалітї презентації поп-артовых творів в найлїпшых музеях і ґалеріях. A мотором того є Енді Варгол, котрый посунув себе, але і далшых поп-артістів (Рой Ліхтенштайн, Кейт Гарінґ, Том Васселманн ... ) дo той самой „ліґы“, в якій суть уж теперь Г. Матісс або П. Пікассо. Веріфікаціов той моёй увагы є ясна демонштрація спомянутых творів і їх продажных, выдраженых цін! A в тій ровинї доволю сі зістати холем до найблизшых ярьных авкцій року 2011 і почекатиі, нa котрім місцю в продаваню своїх робот зась буде Енді Варгол як найлїпше зарабаючій умелець по смерти. Кідь мате чутя, же тота коротка штудія подій із послїднїх днїв на умелецькім торгу є барз о бізнісі, так повторям выслов Е. Варгола на зачатку статї :„Умелецькый обход є крок, котрый наслїдує по уменю“.