В суботу 26-ого октобра проходив на Українї в Мукачові. В пообіднїх годинах Русины продовжовали у своїй святочній атмосфері проґрамом 15-ого річника фестівалу русиньской културы під назвов Червена ружа.

Всезакарпатьскый зъязд Русинів є зъєдинїнём скоро вшыткых русиньскых орґанізацій, котры дїють на теріторії Закарпатя. Цілём зъязду было інформованя окремых членьскых орґанізацій о своїм дїяльстві, о успіхах і неуспіхах, котры в міджізъяздовім періодї на Русинів чекали, але таксамо дефінованя цїлїв, на котрых Русины на Українї мусять робити довєдна. На зъязд дістали позваня і дакотры представителї Русинів з іншых держав, як Мадярьско, Чесько, Словакія, Румунія ці Польща. Пополудне найперше одбыв ся святочный поход Русинів центром Мукачова зо заставами, котрый закінчів ся положінём вінцїв і квітя коло Памятника народного будителя Александра Духновіча. Пак вже одкрыв свої дверї 15-ый річник фестівалу русиньской културы Червена ружа, в котрім ся за веце як 3 і пів годины вычеряли скоро дві десяткы колектівів і соловых інтерпретів.

Єдным з найголовнїшых пунктів зъязду Русинів было приятя резолуції, котра была схвалена єдноголосно. В ній ся пише, же Русины Україны повно підтримують свою україньску державу в єй намаганю о европску інтеґрацію і в намаганю о підписаня асоціачного договору во Вільнюсї того року. Вєдно з тым але припоминають, же дотеперь суть в звязаности з Русинами недорїшены два основны вопросы, а то узнаня Русинів на Українї а таксамо дорїшеня вопросу референдуму з 1991 року, котре выголосила незалежна Україна і котре мало рїшати вопрос самосправованя Закарпатьской области. Тоту резолуцію Русины Україны хотять загнати в анґліцькым тлумачіню до Вільнюсу, де бы мала Европска унія підписати з Українов асоціачный договор. Русины так хотять схосновати можливость одкрыти їх проблемы перед европскыма демократічныма державами, котры дотеперь ниякым способом не рїшали вопрос Русинів на Українї. Днесь собі припоминаме 95 років од взнику першой Чеськословеньской републікы, котру засновали і Русины і вдяка котрій могли пізнїше взникнути окремы Чеська і Словацька републікы. Было бы добрї, кібы во Вільнюсї тоты дві державы не забыли на братів, котры з нима творили першу модерну державность тых народів.

Петро МЕДВІДЬ
(Статя была написана про Радіоновины русиньского высыланя Словеньского розгласу)>