25. мая 2011 Народна рада СР схвалила новелу Закона о поужываню языків народностных меншын. Пaртія Наш край, котра выникла в септембрї 2010 і зато, жебы обгаёвала права і інтересы народностных меншын, высловлює глубоке знепокоїня односно приятя новелы Закона о поужываню языків народностных меншын.

Перед приятём новелы закона сьме привітали ініціатіву підпредседы влады СР про людьскы права і народностны меншыны Рудолфа Хмела і партії „Most-Híd“ зa знижіня квора поужываня языків народностных меншын в офіціалнім контактї в селї і містї, де ку даній меншынї ся приголосило при послїднїм списованю людей мінімално 15% жытелїв. Вітали сьме тоту ініціатіву лем у тім припадї, же ся уплатнить такой по опубліїкованю выслїдків списованя людей у 2011 роцї, не по зрахованю середнёго чісла выслїдків списованя в роцї 2001 і 2011, ано по припадї аж в роцї 2021. Принціпіално не можеме быти согласны з пашквілом, якый ся подарило прьяти посланцям і з боку коалічной векшыны, і з опозічных партій.