... родинї Михала Гиряка, катедрї україньского языка і літературы ФФ ПУ, Інштітуту русиньского языка і културы ПУ, Союзу Русинів-Українцїв Словакії, Русиньскій обродї на Словакії і іншым україньскым і русиньскым орґанізаціям на Словакії. 27. новембра 2013 мине 80 років од дня народжіня єдного з найвызначнїшых фоклорістів пряшівской области – Михала ГИРЯКА (1933 – 2007), а при тій нагодї ся обертаме на вшыткых высше спомянутых і ёго приятелїв.

Михал Гиряк є автором восьмох томів „Українські народні казки Східної Словаччини”, кандідатьской дізертації і такой самой назвы і моноґрафії „Поетика українських народних ліричних пісень Східної Словаччини”; є зоставителём фолклорних зборників: „Пісні Юрка Колинчака”, „Народні пісні села Орябина”, Співанкы Анны Мацібовой,Стружницькыма пішниками”; є зоставителём двотомной Бібліоґрафії народных співанок і народной поезії Русинів выходного Словеньска і автором стовок научно-популарных статей із фолклорістікы і краёзнательства нашого жытельства. Я пропоную в тот день (або близко того датуму) дати почливость тому науковцёви памятным вечором (післяобіддём), значіть стрічов ёго родины, учнів, приятелїв і прихыленцїв у Руськім домі або в іншій інштітуції з приблизно такым програмом:
Я розповім о жывотї юбіланта і ёго приносї до фолклорістікы і буду модеровати проґрам вечора. З маґнетофонного запису прозвучіть ёго голос або голос ёго інформаторів у рамках фоклорістікы і збераня народных приповідок. І ту таксамо буде выставка вшыткых ёго книжковых публікацій. Марія Мачошкова, Анна Деревяникова, Анна Сервіцька, Івета Світокова і іншы співачкы заспівають піснї з ёго зборників у допроводї акордеоністы Ігора Креты. Хтось прочітать єдну або дакілько ёго приповідок ці повідань. У вольній бесїдї найближшы родічі, ёго дїти, учнї, приятелї і знамы выступлять зо споминами на юбіланта. На вечур позвеме і представителїв пресы, радіа і телевізії. Державна наукова бібліотека в Пряшеві (Зузана Джупинкова) приправує до друку „Бібліографію публікованих праць Михайла Гиряка”. Кібы книжка вышла до того часу, на вечорі мож бы було зробити єй презентацію. Прошу підтвердити дїстаня той вызвы і зознамити з нёв приятелїв, знамых і штудентів покійного юбіланта і дати припомінкы к моїй пропозіції на ниже уведжену адресу.
З поздравом