ПгДр. Марія Мальцовска (1951 – 2010), писателька, редакторка, членка Сполку русиньскых писателїв Словеньска, довгорічна актівістка в русиньскім народностнім і културнім жывотї, высокошкольска учітелька, лавреатка Премії Александра Духновіча за русиньску літературу і Премії Словеньского літературного фонду, бы ся того року была дожыла округлого жывотного юбілея.
Інштітут русиньского языка і културы Пряшівской універзіты в Пряшові при тій нагодї зорґанізовав Міджінародный літературный семінар к недожытым 60-ым народенинам ПгДр. Марії Мальцовской, якый ся одбыв 2. децембра 2011. Проєкт быв реалізованый з фінанчнов підпоров Уряду влады СР – проґраму Култура народностных меншын 2011. Цїлём проєкту было представити літературну творчость вызначной особности русиньской літературы, яка вызначнов міров припомогла розвою народной ідентіты, културы і языка Русинів.
Научный семінар быв реалізованый в двох секціях: літературній і языковій. В літературній секції прозвучали рефераты такых літературознателїв, як: проф. Др. Елейн Русинко (США), доц. ПгДр. Василя Хомы, к. н., доц. ПгДр. Андрія Антоняка, к. н., Мґр. Іваны Джундовой, ПгД. і Мґр. Валерія Падяка, к. н. (Україна). Реферуючіма в языковій секції были доц. ПгДр. Василь Ябур, к. н., доц. ПгДр. Анна Плїшкова, ПгД., ПгДр. Кветослава Копорова і ПгДр. Марта Бенькова, ПгД.
Віриме, же предкладана публікація Літературна творчость М . Мальцовской в контекстї сучасной русиньской літературы, зборник рефератїв зо споминаного семінара,буде збогачінём про вшыткых, котры мають інтерес дізнати ся о літературній творчости вызначной особности в области русиньской літературы, ПгДр. Марії Мальцовской. Зарівно хочеме высловити вдячность за фінанчну поміч при выданю зборника і реалізації семінара Уряду влады СР і Катедрї україністічных штудій Торонтьской універзіты в Канадї.