Третїй річник Научных семінарів карпаторусиністікы, котрый орґанізує Інштітут русиньского языка і културы Пряшівской універзіты в Пряшові проходив од марца до децембра 2011 подля традічной штруктуры попереднїх річників: 1. представлїня выступаючого з куртов інформаціов о ёго професіоналнім жывотї, 2. реферат на выбрану тему, 3. діскузія ку реферату, 4. презентація найновшых публікацій з области карпаторусиністікы.

В тім роцї были на семінарах презентованы такы темы: Політічны партії в народнім русї карпатьскых Русинів, выступаючій ПгДр. Станїслав Конєчні, к. н., Традіції русиньского школства на Словеньску: 75 років од взнику Ґрекокатолицькой руськой ґімназії в Пряшові, выступаючій Мґр. Гавриіл Бескид, Становлїня і розвой модерных русиньскых мікроязыків, выступаючій проф. Михаіл Капраль. На рік 2011 припав і юбілей взнику Музея модерного уменя Енді Варгола в Міджілабірцях, зато єден семінар быв присвяченый і тій темі. На семінарі ся резентовали двоє выступаючіх з такыма темами: 1. Творчость Енді Варгола як інтермеділаный вытварный „продукт“ i 2. Музей модерного уменя Енді Варгола в Міджілабірцях, выступаючій Др. Михал Біцко, ПгД. (ёго рефераты прочітав Мґр. Мартін Цубяк, куратор музея). Другов выступаючов была ПаедДр. Даньєла Капралёва з темов: Чом якраз музеоедуколоґія? Послїднїй семінар быв присвяченый русинькому языку і темі: Орфоепічна языкова норма в русиньскім языку (З основных прінціпів русиньской высловности), выступаюча ПгДр. Кветослава Копорова.
Подля штуруктуры, котра была прията, рефераты выступаючіх суть публікованы в зборниках і в языках, в котрых были прочітаны. На кінцю третёго зборника, котрый выйшов кінцём 2011 року – Studium Carpato-Ruthenorum (Штудії з карпаторусиністікы), котрый є выступным документом третёго річника семінарів, суть уведжены основны інформації о реферуючіх. Зборник наісто буде мати своє місце нелем в книжніцї Інштітуту русиньского языка і културы Пряшівской універзіты, де го вывжывають штуденти, але збогатить і публікачный фонд тых, котры реґуларно слїдують розвиток карпатьскых Русинів і інтересують ся о карпаторусиністіку з розлічных аспектів.