27. і 28. авґуста 2010 у Спішскій Новій Всі была третя стріча баньскых міст і сіл Словеньска, але і 15. річник Торгу народных ремесел, на котрім ся представили народны майстры із Словеньска, Польска і Чеськой републікы. Проходив ту і День міста, в рамках якого представили ся умелцї і умелецькы колектівы, заінтересовав алеґорічный віз, а позерателї могли обдивляти і короткы сценкы з історії Спіськой Новой Всі, як і выслїдкы роботы народных майстрів.
Нелем святочне отворіня акцій прошло за участи презідента СР, Івана Ґашпаровіча, котрый навщіву зачав положінём Вінця вдякы ку Памятнику ослободжіню з нагоды 66. років од Словеньского народного повстаня, але і далшый проґрам. Презідент попозерав і окремы станкы Торгу народных ремесел, де го окремо заінтересовали різбярскі выробкы Яна Бобка, родака з русиньского села Торискы, котры передають выявы з господарьского рольницького рока, домінують і родинны а сполоченьскы образы, котры, нажаль, помалы, але істо одходять до забытя.