20. oктобра 2009 одбыла ся в просторах рештаврації і кавярнї Вія Маґна на ул. Главній 27 у Пряшові вернісаж 21. самостатной выставкы фотоґрафій русиньского автора з Пряшова, родака із русиньского села Нижнїй Мирошів, окрес Свідник – Ладїслава Цупера під назвов макроФОТОҐРАФІЇ. Куратором выставкы быв акад. малярь, доц. Душан Срватка, ведучій катедры вытварной выховы і уменя ФГН Пряшівской уніварзіты.
Л. Цупер (1952) є умелецькым фотоґрафом-країнарём, ілустратором поезії і прозы, быв участником многых сполочных выставок і фотопленерів дома і за граніцями, а быв тыж куратором дакількох выставок. Выставляв і в Чеську, Польску, Франції і на Українї. Є знамый і як выдаватель. Выдав і дві свої фотоґрафічны публікації під назвами Ярь родного краю і Горы, синї горы, в сучасности приправує велику публікацію Карпаты. Є знамый і як автор многых фотоґрафій деревяных церьковлей северовыходной Словакії, котры суть богатством сакралной архітектуры Русинів. Выставка, яка ся стрітила з великым інтересом пюозерателїв, была одкрыта в просторах Вія Маґны до 15. нoвeмбрa 2009.