В полїднїх місяцёх 2013 року вышло пять новых публікацій Сполку русиньскых писателїв Словеньска і Академії русиньской културы в Словеньскій републіцї. Першов є збірка поезії Юрка Харитуна з назвов Мої незабудкы (Пряшів: Сполок русиньскых писателїв Словеньска, 2013). Збірка доповнює попереднї дві поетічны збіркы (Мої жалї і Мої сны) і є носталґічным спомином на пережыты рокы. Автор в нїй розвивать філозофічны думкы о жывотї, любви, но як все, у Харитуна домінує тема затопленой Стариньской долины і носталґічных споминів на часы, кідь ёго родна Остружніця іщі не была під водов преграды.

Другым выданём Сполку за рік 2013 є проза Миколая Ксеняка Споминкы і очекованя (Пряшів: Сполок русиньскых писателїв 2013). Автор єй написав (як сама назва назначує) формов споминів на дакотры моменты із свого жывота, котры на нёго мали вплив у ёго розвитку, або такых, котрыма бы хотїв передати чітателёви найважнїшы факты добы і посолство до будучности.

Третёв выданов публікаціов є дебутова збірка повідань молодой авторкы, абсолвенткы учітельского штудійного проґраму русиьскый язык і література – ґеоґрафія Петры Семанцёвой Россыпаны рядкы (Пряшів: Сполок русиньскых писателїв Словеньска, 2013). В нїй суть, окрім молодой прозаічкы Петры Семанцёвой, представлены і творы штудентів Інштітуту русиньского языка і културы ПУ, котры были оцїнены як найлїпшы в штудентьскім літературнім конкурзї в рамках Інштітуту. Поетічну збірку Мої незабудкы і книжку повідань Россыпаны рядкы ілустровала штудентка маґістерьского штудійного проґраму Русиньскый язык і література – вытварне уменя, Бц. Зденка Цітрякова.

Четвертов новов книжков у русиньскім языку є семый зборник баёк од Осифа Кудзея під назвов Сміх через слызы (Пряшів: Академія русиньской културы в СР, 2013). Тот зборник ся одлишує од остатнїх як своёв формов, так і обсягом, якый є веце філозочного характеру. Тов публікаціов автор доказує, же умелецькы росте і же є нелем плодным автором што до кількости, але і якости ёго літературной творчости.

Пятов публікаціов є новела роздїлена на єденадцять частей знамого русиньского поета і прозаїка Штефана Смолея – Бурї над Бескидами. Тов книжков автор доказав, же не стоїть на місцю, але іде допереду у своїй літературній творчости, а то крок за кроком, каждов новов выданов книжков.

Вшыткых пять публікацій можете дістати у высше спомянутых двох выдавателїв і можуть быти вгодным дарунком про вашых найблизшых, причім членове Сполку мають можность книжкы дістати на їх офіціалній презентації, котра буде 12. фебруара (середа) 2014 од 11.00 год. в засїдалнї Consilium maius (2. шток, ч. 328) Ректорату Пряшівской універзіты, ул. 17. новембра ч. 15.