22. децембра 2010 быв у Основній школї з Матерьсков школов у Колбівцях (окрес Стропків) Віфлеємскый вечур.
У нас уж є традіціов, же в передпослїднїй день перед рождественныма вакаціями робиме Рождественный ярмарок, на котрім ся школярї представлять зо своїма выробками, якы выробили в кружку під веджінём учітелькы Ґеряковой. І такым способом собі могли зась овірити свої зручности, шыковность, фантазію при вытваряню річей з папіря, чечіны, природных матеріалів. В тот день сьме ся згромаждили в просторах школьской ходбы, де сьме мали свої станкы і продавали інтересуючім ся свої выробкы. Рождественну атмносферу підсылёвала рождественна музика і колядкы. Красно выпараджена школа і снїжна білость країны дотваряли святочну атмосферу в то рано, кідь сьме перекрочіли поріг своёй школы, бо і теперь сьме ся зышли довєдна на долній ходбі і чекали сьме, коли приде Миколай зо своїм допроводом – чортом і ангелом. Зазвучали тоны рождественных співанок і він ся обявив міджі нами. Сердечно го привітав директор школы Мґр. Осиф Варголик. Mиколай, кідь відїв гунцутьскы іскеркы в очах дїтей, приговорив ся ку ним милыма словами. Далшы минуты належали нам – дїтём. Росжарены тварї малых ангеликів, непослушного чортика, вкусны костімы, вінчованя, колядкы, темпераметный ромскый танець, сценкы з ріствянов тематіков – то вшытко доміновало на сценї перед позерателями, котры нашы выконы оцїнёвали аплавзом. Mиколай ся подяковав дїтём за красны выступлїня і щедров руков сягав до коша і вшыткы дїти обдаровав дарунками. На конець прозвучали тоны знамой піснї Тиха нїч, свята нїч і Миколай зо своїм допроводом одышли зо школы, обіцяючі нам, же за рік ся вернуть міджі нас, абы нам сприємнили рождественный час. А на самый конець дякуєме о. Осифови, редемпторістам із Стропкова, панови Барткови, котрый спонзоровав тоту прекрасну акцію.

Рeдaкчна рaдa Йоты при ОШ із МШ в Колбівцях