14. фебруара 2011 у засїдалнї ректора Пряшівской універзіты в Пряшові ся одбыла громада Сполку русиньскых писателїв Словеньска (СРПС).
На єй зачатку было оцїнено діятельство орґанізації в минулім роцї. Представили ся проєкты, котры были приправлены в 2010 роцї (Літературный семінарь, Літературный конкурз і Русиньскый літературный алманах). Были высловлены і пропозіції актівіт на то рік. Председнічка сполку ПгДр. Кветослава Копорова ся подяковала писателям, котры в роцї 2010 збогачовали русиньску літературу своїми новыма творами.
Єдным із пунктів громады было голосованя за зміну назвы Літературного конкурзу СРПС на тот котрый рік на конкурз на Літературну Премію Марії Мальцовской, на почесть вызначной русинькой писателькы, котра одышла в роцї 2010 до вічности. Премія бы ся під новов назвов зачала передавати уж за рік рік 2011. Гласованём была зміна єднозначно одсоглашена.
Далшым пунктом проґраму было приятя новых членів до сполку. Стали ся нима: Квета Мороховічова-Цвик, Івета Мелнічакова, Петро Ялч і Аліца Вєтошевова. Важным пунктом было голосованя за вступ СРПС до Словеньской асоціяції русиньскых орґанізації (САРО). Члены СРПС векшынов голосїв вырішыли вступити до САРО.
Послїдным пунктом было голосованя за доповнїня членів выбору Сполку, котрыма ся стали Осиф Кудзей і Аліца Вєтошевова. На конець громады была высловлена вызва на передкладаня проєктів на рік 2011.