11. і 14. септембра 2009 буде такый день у Высокошкольскім ареалї Пряшівской універзіты в Пряшові, ул. 17. новембра 1, аула ч. 97, на котрый Вас позываме.
У проґрамі од 9.45 до 13.30 год. на зачаток выступлять: знама інтерпретка русиньскых народных співанок Анна Порачова в допроводї гры на акордеонї Йозефа Пірога, потім участників презентації привітать ПгДр. Анна ПЛЇШКОВА, ПгД., директорка Інштітуту русиньского языка і културы ПУ в Пряшові а о проєктї поінформує притомных єй авторка – ПгДр. Кветослава КОПОРОВА.
10.00 – 11.30 І. тема: Русиньскый списовный язык, русиньскы орґанізації, школьска сфера, історія і набоженьскый жывот Русинів на Словеньску: – ПгДр. Анна Плїшкова, ПгД.: Русиньскый списовный язык на Словеньску, ёго функціоналны сферы і можности высокошкольского штудія, – ПгДр. Станїслав Конєчні, к. н.: Русины в історічных переломах 2. тісячроча, – ПгДр. Кветослава Копорова: Сполкы і орґанізації в русиньскім возроднім процесї, – ТгЛіц. Франтїшек Крайняк: Русины в конфесіоналній сферї.
12.00 – 13.30 ІІ. тема: Русины в міджінароднім контекстї, выдавательска робота, театер: – Мґр. Александер Зозуляк: Світовый конґрес Русинів і выдавательска робота, – ПгДр. Марія Мальцовска: Сучасна русиньска література, – Мґр. Маріан Марко: Сучасный русиньскый професіоналный театер.
Діскусія
Акція є реалізована з фінанчнов підпоров Міністерства културы Словеньской републікы – проґрам Култура народностных меншын 2009.