21. і 23. авґуста 2009 были два фестівалы у Войвидинї (Сербія), де у великій мірї жыють Русины. Першый фестівал народных орхестрїв під назвов „Мелодиї Руского двору“ быв у Шидї і зорґанізовали го: Културно-освітне общество „Дюра Кіш“ і Общество Русинів у Новім Садї. На нїм выступили културно-умелецькы общества і фоклорны колектівы з Нового Орахова, Шіду, Дюрдёва, Коцура (вшытко Сербія), але і Петровцїв (Хорватія) і Камюнкы (Словакія).
Другый фестівал народного співу, названый „Най ше нє забудзе“, быв о два днї пізнїше у Дюрдёві і приправило го село і містне Културно-освітне общество Тарас Шевченко. Тот фестівал своїм выступом збогатили співацькы колектівы, ґрупы і солісты з Миклошевцїв і Вуковару (Хорватія), Скопє (Македонія), Дюрдёва, Нового Саду, Кулы, Суботїцы, Коцура і Руського Керстура (Сербія). Мужску співацьку ґрупу з Р. Керестура порота оцінила за найлїпшу.