16. септембра 2011 од 8. 30 год. на великій сценї Театру Александра Духновіча в Пряшові одбуде ся 12. річник цїлословеньского конкурзу в декламації русиньской поезії, прозы, презентації сценок, властной творчости і народного росповіданя – Духновічів Пряшів 2011.
Місто Пряшів было і є міцно споєне з меном славного русиньского будителя Александра Духновіча. А мож повісти, же і ёго заслугов Пряшів ся став главным центром богатого културно-сполоченьского, освітного і церьковного діятельства Русинів. Ку тому ся снажыть приспіти, як то уж стало традіціёв, орґанізатор Русиньска оброда на Словеньску, котра приправує свою цїлословеньску акцію під назвом Духновічів Пряшів 2011. Хто брав участь на такых акціях, знать о чім є реч. Зато главно на вас, дорогы діректоры школ, учітелї русиньского языка і школярї, обертаме ся з пропозіційов взяти участь в тім цїлословеньскім конкурзї. Того року з фінанчных прічін він ся пересувать на місяць СЕПТЕМБЕР. Новый річник конкурзу понесе ідею якости перед кількістёв. Уж теперь вам обіцяме много несподївань і нового, модерного духа в комбінації з традіціёв і презентаціёв нашого цїнного материньского русиньского слова. Без огляду на тото, ці во вашій школї ся учіте русиньскый язык, ці школярї і штуденты знають азбуку, даваме вам можность взяти участь в конкурзї і такым способом презентовати наш прекрасный русиньскый язык і літературу. Того року змагати ся буде в катеґоріях 0 – 5. 0. катеґорія (дїти матерьскых школ і першокласникы основных школ), 1. катеґорія (дїи 2. і 3. класів ОШ), 2. катеґорія (дїти 4. і 6. класів ОШ), 3. катеґорія (школярї 7. – 9. класів ОШ), 4. катеґорія (штуденты середнїх школ, учіліщ і высокошкольска молодеж), 5. катеґорія (дорослы). Обогачены суть і окремы жанры: поезія, проза, властна творчость, малы сценічны формы, народне росповіданя і духовна творчость. І того року готовиме славностный акт выголошіня ЛАВРЕАТА ДУХНОВІЧОВОГО ПРЯШОВА. В двох катеґоріях – дорослый (учітель, котрый найінтензівнїше і найвеце приготовлять дїтей на акцію) і школярь, котрый брав дотеперь найбівшу участь в дотеперішній історії Духновічового Пряшова, або найвеце заінтересовав пороту. Лавреат здобуде окрему цїну – русиньского оскара і фінанчну одміну од орґанізатора. О лавреатах вырїшує одборна порота на основі пропозіцій од орґанізаторів. Вірьте, же мате ся на што тїшыти. Окрем того, каждый участник дістане уж традічный діплом, а вітязї окремых катеґорій і інтересны цїны. Но іщі перед тым треба выграти першы місця на окресных, містных або крайскых конкурзах, бо до Пряшова бы мали прийти лем тоты найлїпшы з найлїпшых. Споминаны конкурзы треба зреалізовати до 22. юна 2011, а потім выписати приглашку і до 27. юна 2011 послати на адресу: Русиньска оброда, ул. Левочска ч. 9, 080 01Пряшів. На копертку треба написати ДП. Приголошіня од 1. юна найдете і на інтернетовых сторінках: www.rusynacademy.sk, www.rusyn.sk або www.molody.rusyny.sk. Веце інформацій вам даме на тел. чіслї: 051 77 22 889, 0918 176 804 або на і-мейлї: sekretariat.ros@centrum.sk. Змагати ся буде в такых катерґоріях, в якых даный участник выграв окресне коло, з чого выпливать, же катеґорії ся не будуть мінити тым, же в часї перебіганя цїлословеньского конкурзу буде уж новый школьскый рік. Дякуєме за порозуміня.
Одборна порота, ексклузівны гостї, як і орґанізаторы акції уж теперь тїшать ся на вашу участь! До свіданя в Пряшові.


Приглашка на конкурз Духновічів Пряшів 2011
Дуxновічів Пряшів – цíлословеньскый конкурз в русиньскій декламації ся одбуде 6. 9. 2011 в Театрі Александра Духновіча в Пряшові на Ярковій ул. ч. 77.
Мено і призвіско: .............................................………………
Школа і дом. адреса: .............................................………………
Автор‚ назва твору: .............................................………………
Жанер: .............................................………………
Катеґорія: .............................................………………
Тел. контак на родіча або учітеля: .............................................……………….

Приглашкы посылайте до 27. юна 2011 на адресу: Bc. Silvia Lysinová, Rusínska obroda‚ Levočská 9‚ 080 01 Prešov. Oзначте їх геслом: DP.