Рік 2011 быв найтяжшым про нас роком за нашу 20-річну екзістенцію як редакції, главно зато, же Секція народностных меншын і етнічных ґруп придїлила нам смішны сумы на інтернетовы новинкы Академія русиньской културыв СР (наперек тому сьме выдали вшыткых 52 планованых чісел), Народны новинкы (выдали сьме тыж планованых 12 чісел) і Русин (выдали сьме 4 чісла нормалны і єдно двойчісло). А докінця зо штирёх нашов редакціёв предложеных кньжок не схвалила дотацію ани на єдну з них!!!

Таке ту іщі не было!!! Самособов, тото вшытко схвалив своїм підписом підпредседа влады СР Рудолф Хмел, якый одповідать за тот резорт. Але жебы нашы періодічны выданя пережыли, зато патрить вдякам гловно Штефанови Чепови з Торонта, Катедрї українознательскых штудій Тороньской універзіты і Міланови Мнягончакови з Гуменного. Щіро їм іщі раз дякуєме, і віриме, же зостануть нам вірны, як много іншых, котры нам фінанчно помогли, но вшыткых не мож в тій статейцї спомянуты, але они были або іщі будуть спомянуты на сторінках окремых нашых періодік. Дякуєме серчно і вшыткым нам вірным чітателям і дописователям і желаме главно много зравя, родинного щастя і успіхів у роботї, коротко повіджено: вшытко найлїпше, што собі желають.