11. – 13. новембра 2011 в Ґрекокатолицькім катедралнім храмі св. Іоана Хрестителя в Пряшові під покровительством владыкы Яна Бабяка, СІ, пряшівского архієпіскопа і митрополиты, одбыв ся юбілейный ХХ. Фестівал духовных співів візантьского обряду.
Проґрам фестівалу зачав у пятніцю 11. новембра святов літурґіов, котру одправляв Монс. Ян Бабяк, СІ, і почас котрой співав хор СТАУРОС, якый дїє при Храмі Воздвижіня святого Хреста на сідліску Пряшів-Секчов. В рамках суботнёго главного проґраму выступило 14 хорів із цїлого Словеньска. Треба оцїнити, же співы, котрыма ся хоры презентовали, были в церьковнославяньскім языку а їх інтерпретація была на высокій умелецькій уровни, што оцїнила публіка силныма аплавзами. Монс. Я. Бабяк підкреслив: „Співы, якы прозвучали в пряшівскій катедралї, были ославов і проявом глубокой віры в Господа Бога, але і любви і обдиву к выходному хоровому співу. Вшыткы, што пришли до катедралы, были наповнены силным умелецькым і духовным зажытком, за што належыть орґанізаторам фестівалу, але і выступаючім, глубока вдяка і узнаня.“ В недїлю на конець фестівалу на Службі Божій о 8.00 год. выступив катедралный хор ХРІЗОСТОМОС із Братїславы а на святій літурґії о 10.00 год. хор ГЛАГОЛ із Пряшова-Сідліска ІІІ. Вообще юбілейный фестівал быв барз успішным про хоры і радостным про віруючіх.