1. апріля 2011 была перед Шарішсков ґалеріов у Пряшові вернісаж выставкы найлїпшых робот 17. Міджінародного конкурзу рисованого гумору – Золота бочка 2011, в якім взяло участь 221 авторів із 41 держав з 549 рисунками на тему „пиво“, котрый приправив у першім рядї „нянько“ того конкурзу і главный ёго орґанізатор од самого зачатку по сучасность – русиньскый карікатуріста Федор Віцо з Пряшова. Окрем вітязїв конкурзу, порота на челї з директором ТА СР ПгДр. Я Резнїком, придїлила і 16 честных тітулів, з котрых 6 путує до далекой Чіны. На вернісажі ся зышло много Пряшівчан, карікатурістів зо Словеньска і гостї з Булгарії, Україны, Польска і т. д. Головну цїну – Ґранд прі Золота бочка 2011 здобыв Булгар Р. Драґостінов, 2. місце – Я. Фрацкієвіч з Польска а 3. місце Л. Торма зо Словеньска. Лавреатами далшых цїн были: М. Барвірчак із Словеньска, Я. Грубый із Чешска, Ґ. Павлова з Булгарьска і ін. Выставка в Шарішскій ґалерії у Пряшові буде отворена до 20. мая 2011.