24. – 26. юла 2009 незіскова орґанізація Русиньскый центер у Свіднику зорґанізовала нултый річник Фестівалу карпатьской културы Русинів (ФЕКАКУ), котрый ся одбывав в лонї прекрасной природы в ареалї звіздарнї в Ростоках (окр. Свідник). Плановало ся з велькым фестівалом, но внаслїдку фінанчной крізы і недостатку фінанцій ся россяг і проґрам фестівалу зредуковали. Наперек тому ся вказало, же ФЕКАКУ мать потенціал, жебы ся в будучности з той міджінародной молодежной културной акції стало достойне і репрезентатівне свято русиньской карпатьской културы скоро у вшыткых єй формах. Велика часть проґраму фестівалу належала модерній музицї. Як першый выступив „Ладё зо складу“, котрый участників забавляв скоро півгодину гров на ґітарї, устній гармоніцї і тамбурінї. З властыма співанками ся представив Крістіан Гуняра зо Стащіньской Ростокы. Крістіан ся прославив з капелов РАСПУТЇН і своїм сонґом Чом вы, Русины... Позад нёго як „туча“ пришла на сцену зновузроджена капела ЧУМзБАҐЕРА, котрой штири співанкы были прияты з великым аплавзом. Кошічане ЮРІЙ and The GaGarins привели участників до транзу, їх музика ся мі досправды любила. Фінале першого дня належало двом польскым капелам. AVARIANT NATO уж Свідничане знають як з фестівалу у Ждынї, так і зо Свідника, де пару раз выступляли. Капела грать реґе і панк. Ужасна была і друга польска капела ADHD, котра грає панк. Окрем музикы ся промітали і філмы з русиньсков тематіков, місто ту мала і Варголіада Осифа Кеселіцї.