В днях 12. аж 14. юла 2013 року проходив на Підкарпатю вже 12. Світовый конґрес Русинів, котрого засїданя одбыли ся в Ужгородї і Сваляві. Домашнїй орґанізатор, котрым быв Микола Бобинець, голова Краёвого товариства Подкарпатьскых Русинів, мав намагу пересвідчіти участных, же одношіня україньской державы к Русинам змінило ся і списованя жытелїв, яке має одбыти ся на Українї, буде зроблене так, жебы Русинів держава конечно узнала як окрему народностну меншыну.

Того свідчінём мала быти і участь Ивана Качура, заступника Олександра Ледиды, ґубернатора Закарпатьской области Україны, і Ивана Бушка, депутата Верховной рады Україны на одкрытю конґреса. Але є тому реално так, або то быв лем театер, котрый міг быти пересвідчівый лем про тых, котры сітуацію на Українї ближе не знають? По перше, ґубернатор Закарпатя не міг собі найти ани тілько часу, жебы в єден або другый день, пришов сам поздравити Русинів, а посилать лем свого депутата. Кібы мав серіёзный інтерес, тых 20 минут бы собі вже даяк нашов. По друге, кібы там пришов і сам ґубернатор Закарпатя, він не заступать жадный орґан, уряд ани міністерство, котре має ссписованя жытелїв орґанізовати. Таксамо як Иван Бушко, єден із 450 депутатів Верховной рады, не заступав никого іншого, лем самого себе на русиньскім конґресї. Ани єден із них не мав і не вказав жадне повірїня од державы, жебы тлумачіли реалну позіцію державы к Русинам в одношіню к списованю ці узнаню Русинів на Українї. Ефект про незаінтересованых, котры не знають сітуацію, може великый, але жебы тото даякым способом рушало дїла русиньского вопросу допереду, то ся бізовно не дасть повісти. Лем театер. Властно, дало ся то і чекати. Тадь конґрес в першый день проходив в будові театру. Кібы там пришов хтось із влады або уряду, котрый списованя орґанізує, втогды бы сьме могли повісти, што цілый час твердив Микола Бобинець, же дїла на Українї рушають ся і русиньскый вопрос буде в найближшій добі вырїшеный. І так ся в ротах вызначных гостей знова повторяли лем даякы порожнї слова о забезпечіню „пустых ґраф“, де собі Русины будуть годны записати, же суть Русинами. Але узнаня Русинів, то не є „пуста ґрафа“. Русины будуть реално узнаны, коли нарпдность Русин буде прямо выдрукована на анкетовых листках і Русины будуть годны прямо вызначіти, же суть Русинами, без різіка, же наконець їх і так зрахують довєдна з Українцями і будуть їх дале поважовати за субетнос україньского народа.

Вопросом є, ці представителям Партії реґіонів Виктора Януковича, із котрой є Ледида, Качур і Бушко, Микола Бобинець наівно вірить, або сам, як член реґіоналів, помагать шырити лож, котра має упокоїти Русинів перед списованём жытелїв і допомочі зохабити сітуацію, котра на Україні є вже 22 років, без векшых протестів домашнїх і загранічных Русинів, так, як є і як то Українї пасує. Кідь собі але усвідомиме, же орґанізатор не хотїв на засїданя в Ужгородї пустити до театру домашніх Русинів, міджі іншынм і Димитрия Попа ці вызначного Русина, Народного умелця Україны – Володимира Микиту, потім мі з того выходить лем єдно. І то, же Бобинець знав выдкы вітор дує, яка є україньска політіка і бояв ся, же домашнї Русины пояснять при стрїчі з участниками конґреса, яка є реална сітуація. На цїлій сітуації є найлїпше, же Олександр Ледида, котрый про свої робочі повинности не быв годен прийти поздравити Русинів ани до Ужгорода, ани до Свалявы, бо в тот самый день, як проходило засїданя в Сваляві, быв участный фотбалового змаганя молодых фотбалістів. І вручав там даякы оцїнїня. Де? Прямо на Свалявщінї. Тым ся лем потвердило, яку пріоріту мають Русины у ґубернатора Ледиды. Также, важены Русины на Українї, перестаньте зо заснованём даякых орґанізацій, з орґанізованём културных і освітных подій, зруште свої русиньскы недїльны школы і цїлково – перестаньте з якымсь возроджінё і рухом коло нёго. Зъєднайте ся, засновайте фотбаловы команда і грайте фотбал. Кідь будете грати добрї, буде о вас мати інтерес і ґубернатор, сам вам прийде вручати оцїнїня, увагу до вас зверне і держава і будете важеныма жытелями Україны. І кідь не будете узнаны як Русины, холем узнають вас як добрых фотбалістів. Конець возроджіня, подьме грати фотбал!