11. октобра 2010 зорґанізовала Ґрекокатолицька теолоґічна факулта в Пряшові міджінародну научну конференцію під назвом Рефлексія єдности в роботї і жывотї благореченого єпіскопа Василя Гопка в контекстї евроінтеґралной процедуры, яку факулта зреалізовала за помочі ґранту научного проєкту ВЕҐА.
Конференція была присвячена части жывота блаженого Василя од обновлїня діятельности Ґрекокатольцькой церькви в 1968 роцї аж по ёго смерть у 1976 роцї. Проф. ТгДр. П. Штурак зачав научну конференцію першов лекціов о епосї, в якій благореченый В. Гопко жыв. На конференції притомны выслухали много інтересных рефератів, котры ся занимали різныма дімензіями жывота владыкы Василя, но могли ся дізнати і о фактах із процесу выголошіня за благореченого, з якыма выступив постулатор процесів беатіфікації П. П. Ґойдіча і В. Гопка – Мґр. Я. Креглік. Про многых найінтереснїшым ся став выступ ПаедДр. Ф. Данцака, котрый особно барз добрї знав благореченого владыку Василя і представив притомным особну корешподенцію з ним, яка тривала дакілько років. В. Гопко записав ся до жывота Ґрекокатолицькой церьквы на Словеньску як єдна з найвызнамнїшых особностей і може нам быти прикладом при будованї іщі все так потрібной русиньской єдности і добрых міджілюдьскых односин.
За благореченого го выголосив папа Іоан Павел ІІ. 14. септембра 2003 у Братїславі.