Од кінця децембра 2011 Мґр. Квєта Галасова, роджена Мороховічова, понукать про найменшы дїточкы пригорщу ілустрованых гаданок під назвов – Камаратя спід зеленого дуба і белавого неба (Пряшів: Сполок русиньскых писателїв Словеньска, 2011, 112 стор.).

Авторка ся народила 20. апріля 1946 в Мостї (Чеська републіка). Її корїня сягать до русиньского села Пчолине, Сниньского окресу. Ту выходила пять клас початковой школы, другый ступень ОШ выходила в Снинї, де пізнїше зматуровала на Середнїй общоосвітнїй школї (СОШ). Маґістерьскый тітул здобыла на ФФ Універзіты Павла Йозефа Шафаріка в Пряшові. Постґрадуалны штудії абсолвовала на Факултї журналістікы Карловой універзіты в Празї.
Наслїдно была редакторков Прешовскых новин, Україньского штудія СРо в Пряшові, Нашых новостей. Свої статї публіковала і в такых прінтовых медіях, як Выходословеньскы новины, Нове життя, Глас люду, Функціонарка. Цїлый свій професійный жывот присвятила новинарьскій роботї. Писати не перестає ани на пензії. Вже дакілько років пише по русиньскы, своїм материньскым языком, а свої роботы публікує, главно в Народных новинках під меном Квета Мороховічова Цвик. Дотеперь єй вышла книжка поезій Думкы і тужбы (Пряшів: Русин і Народны новинкы, 2010). Авторка є членков Сполку русиньскых писателїв Словеньска і членков Літературного клубу Ґенерації при Бібліотецї Антона Бернолака в Новых Замках. Стишкова книжка гаданок Кветы Мороховічовой Цвик має доповнити полічку дїтьскых книжочок, котрых з продукції сучасной русиньской літературы є іщі все мало. Бо праві ту ся кладуть фудаменты, о котры ся операть і материньска бісїда, з якой цїлый жывот черьпаєме жывотодарну мязґу. Тыкать ся то главно наймолодшой ґенерації, т. є. дїточок передшкольского віку, про котры в єдній лінії з текстом книжкы стоять ілустрації майстрів пензля. В нашій книжцї Камаратя спід зеленого дуба і белавого неба буквы, слова, речіня суть доповнёваны прекрасныма образками, котры намалёвала реномована авторка Юлія Єґорова Роґова з Україны. Книжка гаданок няй буде милым сполочником Вашых дїточок і їх добров камаратков.


• • •

Мілы дїточкы, важены родічі!
Дїти передшкольского віку – котрым є тота книжочка в першім рядї адресована – іщі не знають самы чітати, але в книжках з образиками люблять листовати, зато думам собі, же і тоту книжочку, прекрасно ілустровану панї малярьков з Україны, собі з радостёв попозерають і облюблять. А вы, милы родічі, їм тых пару рядків прочітайте. Своїм дїточкам тым поможете, абы писане слово, котре з вашов помочов ся стане говореным словом, прияли за своє, подумали над ним і з помочов невычерьпной дїтьской фантазії збогатили ся новыма знанями. Я пересвідчена, же їх здогадаєте, чім властно зробите важный крочік у своїм молоденькім жывотї. Обявите ся на першім ґарадічіку на пути за науков, за спознаванём світа навколо нас, котрого сьме недїлимов частков. Кажду хвілю ся стаєте старшыма, мудрішыма…