2. септембра 2013 минуло 5 років од заложіня першой Основной школы з русиньскым языком навчаня в Чабинах од револучного 1989 року. Школа зачала своє діятельство зо семома школярами, а од того часу ся звекшыло чісло школярів на 17.
Дїточкы по вакаціях наступили одпочінуты і а як директорка школы єм їх щіро привітала і зажелала єм їм міцне здоровя, много сил і успіхів, жебы ся добрї учіли і жебы любили ходити до школы. Кідьже з дїточками пришли і дакотры родічі, так і їм єм зажелала, жебы мали достаток терпезливости при выхованю своїх дїточок і при їх приправі на навчаня. Так істо єм высловила думку, жебы і далшы родічі не ганьбили ся за свій родный русиньскый язык, котрый є такый прекрасный. Тыж їм хочу одказати, же кідь будуть мати можливость дати свої дїточкы на навчаня русиньского языка, жебы не вагали, бо так ся научать азбуку і дізнають ся много з русиньской културы і традіцій нашых предків, котры ся помалы вытрачають з нашого жывота. Мы сі часто хыбно думаме, же головне є научіти ся анґліцькый або нїмецькый язык. Но наша школа свідчіть о тім, же ся то дасть і на русиньскій школї, де мають нашы школярї і годины анґліцького языка, а то нияк не бранить тому, жебы ся могли учіти і по русиньскы, а то вшытко на якостній уровни.