В школьскім роцї 2009/2010 выголосила фірма „EXAN testing“ новый цїлословацькый конкурз „Vševedko“ (Вшыткознайко), котрый уможливив дїтём указати свої знаня з різных научных областей. До нарочного конкурзу ся запоїло і 11 учнїв із Основной школы на Будовательскій уліцї в Снинї.
Участници сутяжі мали 40 минут на то, жебы одповіли на 30 вопросів з різных сфер наукы – краёзнательство, природознательство, словацькый язык, математіка, музычне выхованя і вытварне выхованя. Одмінов за наше 4-річне снажіня при сістематічнім учіню ся были опублікованы выслїдкы конкурзу Вшыткознайко. Двоме нашы школярї-четвертаци (поз. ред.: Русины), Михал Червеняк і Домінік Шмайда здобыли повне чісло бодів, а тым і 1. місце в сутяжі, о котре ся дїлять з далшыма 10 дїтми зо Словеньска і вєдно ся дістали до „Ґалерії славы“ найуспішнїшых споміджі 7 400 дїтей.