Кінцём новембра і в децембрї 2012 вышли штири найновшы русиньскы неперіодічны выданя, котры наісто потїшать нашых чітателїв. Іде о зборникы поезії Молитва Русина од поета Мілана Ґая (выдаватель: Академія русиньской културы в СР) і Ружа під облаком писателькы Гелены Ґіцовой-Міцовчіновой (выдаватель: Сполок русиньскых писателїв Словеньска). Так істо і послїднї дві публікації вышли зо значков Сполок русиньскых писателїв Словеньска – выбір найлїпшой короткой прозы Марії Мальцовской – Найкрасша приповідка і хосенне кутурно-научне выданя автора з Ужгороду, конкретно Валерія Падяка – Нарис історії карапаторусиньской літературы ХVI. – XXI. стороча. Вшыткы спомянуты выданя суть нелем кроком допереду в збогачованю літературы Русинів на Словеньску і за єй граніцями, але вообще літературы.