Народив ся 19. октобра 1964 у Пряшові. Уж в часах середнёшкольскых штудій на ґімназії у Пряшові быв актівным членом театралного колектіву Штудент. В роцї 1985 вступив як елев до драматічного колектівы тогдышнёго Українського національного театру в Пряшові. По абсолвованю штудій на Высокій школї театралного уменя Карпенка-Карого в Києві (1986 – 1990) став ся сталым членом драматічного колектіву театру, якый од р. 1990 несе назву Театер Александра Духновіча в Пряшові.
Miджі ёго найвызначнїшы ролї належать: Бартоло у Барбєрови із Севіллї, Лацкань в інсценації Аґафія, попова дївка, Стецько в Дивных спросинах, Фалалей у Селї Стєпанчіково, Ондраш Махуля в грї Непробудженый, Xронос в Ла музика, Ісус Марія у пєсї Рівнина Тортілла, Осел у грї Дон Кіхот де ла Манча, Луко в Орхестрї Тітанік, Федор в Окреснім шпыталю, Ненад у Чуєш, мамо…, Парфен Роґожін у пєсї Ідіот, Ілля Іллїч Телеґін у Дядёви Ванёви, Каліґула в ровноменній грї Каліґула, Клещ у пєсї На днї.
Серґея Гудака познали позера-телї нелем із сцены, але мали можность го чути і з радіа, главно в русиньскім народностнім высыланю, но тыж собі го памятаме яй герця у многых ролях у такых філмах, як Zdivočelá země, Anjel milosrdenstva, Cesta do Budína, Četnícke humoresky, Želary і т. д.
В ёго особі одышов представитель силной герецькой ґенерації, котрый належав к опорам драматічного колектіву Театру Александра Духновіча в Пряшові. На послїдню путь го выпровадила родина, приятелї, колеґове і знамы 5. юна 2009. В Домі смутку в Пряшові з прощалным словом выступили: артістка ТАД Ярослава Саболова Сисакова, научный працовник, проф. ПгДр. Микола Мушинка, др. н., ведуча оддїлїня културы і шпорту Містьского уряду в Пряшові Мґр. Марія Путноцка і директор ТАД Маріан Марко.
Вічная ёму память!
- р -