Новинкы • Noviny • News 16/2010

• Продовжує 2. річник семінарїв

  31. марца 2010 Інштітут русиньского языка і културы Пряшівской універзіты в Пряшові в сполупраці з редакціов Русин і Народны новинкы, Сполком русиньскых писателїв Словеньска і СНМ – Музеём русиньской културы в Пряшові отворив другый річник свого довготривалого проєкту научных семінарїв карпаторусиністікы, a тo семінарём присвяченім 15. роковинам кодіфікації русиньского списовного языка на Словакії і выданю 100. книгы у русиньскім языку пряшівсков редакціов Русин і Народны новинкы.

• Снинчане в польскім Ржешові

  29. і 30. марца 2010 штиричленна ґрупа працовників сниньской самосправы на челϊ з віцепріматором Яном Чопом взяла участь на вступній конференції в польскім містї Ржешов. Tота путь была зреалізована в рамках черезгранічной сполупраці ку проєкту „Можности выужываня старого Віслока на еколоґічну освіту і турістічны цілї“. Конференцію зорґанізовало здружіня „Eurogalicja“, котрому ся подарило на проєкт здобыти фінанції з Проґраму черезгранічной сполупраці Польско – Словеньска републіка. Двойднёва конференція была заміряна главно на охрану жывотного оточіня і захрану незреґулованого корыта потічка Віслок.