Новинкы • Noviny • News 30/2010

• Літературный конкурз 2010

  Oд 1. авґуста до 30. октобра 2010 Сполок русиньскых писателїв Словеньска першый раз у сполупраці з редакціов Русин і Народны новинкы выписує конкурз на найлїпшы творы в области поезії, прозы, есеїв і драмы в списовнім русиньскім языку. Оріґіналны літературны творы може на адресу редакції (Духновічово нам. 1, 081 48 Пряшів) посылати каждый автор од 18. року віку, жыючій в Словеньскій републіцї. А то анонімно, же адреса буде залїплена в другій обалцї, як літератрурный твір, але треба то послати вєдно. Найлїпшы роботы, выбраны одборнов поротов, будуть оцїнены і опублїкованы главно в Русиньскім літературнім алмаху, часть з них таксамо в Народных новинках і Русинї.
  

  Приправный выбор літературного конкурзу

• Хочете штудовати русиньскый язык?

  До 13. авґуста 2010 хто має інтерес штудовати русиньскый язык і літературу од академічного року 2010/2011 на Пряшівскій універзітї в Пряшові, може собі іщі дати приглашку на Факулту гуманітных і природных наук ПУ (адреса: Fakulta humanitných a prírodných vied, Ul. 17. novembra č. 1, 081 16 Prešov. В рамках ІІ. кола вступных екзаменів ФГПН ПУ приїмать приглашкы на денне бакаларьске штудіум учітельства русиньского языка і літературы в трёх комбінаціях: з фізіков, технічнов выховов і етічнов выховов (позн. комбінація русиньского языка і літ. з еколоґіов, як сьме увели в минулім чіслї НН, ся не буде в далшім академічнім роцї отваряти). Подробнїшы інформації мож найти на інтернетовій сторінцї ФГПН ПУ: http://www.unipo.sk/fakulta-humanitnych-prirodnych-vied
  

  -р-

• Малярь добрї знамый на Словакії

  21. юла 2010 была святочна вернісаж у СНМ – Музею русиньской културы у Пряшові 13. персоналной выставкы олїовых образів Віталія Либы з Ужгороду.Але він, може, знамішый на Словеньску, як на Українї, бо ту мав 12 самостатных выставок і взяв участь на многых колектівных выставках.