Новинкы • Noviny • News 4/2009

• Русиньскы фестівалы будуть у Пчолинім, Тополї або Ростоках

  26. юла 2009, окрем іншых, будуть два фестівалы, котры треба спомянуты, конкретно в Пчолинім і Тополї, котры орґанізують сільскы уряды даных сел і обчаньске здружіня Русиньска оброда на Словеньску (РОС). В Пчолинім буде 15. річник русиньского фестівалу а в Тополї, роднім селї наропдного будителя Русинів у 19. сторочу – Александра Духновіча, а то русиньскый фестівал з нагоды к 206-річу од ёго народжіня . Обидва фестівалы будуть в окресї Снина. В окресї Свідник зась 24. – 26. буде Фестівал карпатьской културы, котрый орґанізують в Ростоках Русиньскый центер і РОС.

• Пригода Варголовых Кембелловых поливок

  В місяцёх юл і авґуст 2009 в Музею модерного уменя Енді Варгола в Міджілабірцях мож попозерати выставку кардіналной серії поп-арту, комплетного портфолія „Campbell´s Soup“, котре Енді Варгол вытворив про нёго тіпічнов техніков сітёдруку. Пригода Кембелловых поливок але зачав перед 47 роками, точно 9. юла 1962, коли першый раз были выстаблены Варголовы полотна Кембеловых поливок, якы в історії вытварного уменя 20. стороча поважують вядно з далшым твором „Brillo Box“ за єдны з найреволучнїшых подій.

• Філм о Осаднім оцінили в Карловых Варах

  12. юла 2009, на кінець 44. річника Міджінародного філмового фестівалу в Карловых Варах у Чехії, як найлїпшый документарный філ над 30 мінут быв оціненый філм під назвов Осадне. Є то філм о найвыходнїшім кутику Европской унії, русиньскім селї Осадне, ёго жытелях і їх політічных поглядах, у котрім домінують главно трёме протаґоністы: староста села Ладіслав Мікулашко, тутешнїй православный піп Петро Сорока і русиньскый актівіста Федор Віцо. Крішталёвый ґлобус і 5 тісяч америцькых доларів перевзяли творцї філму: режісер Марко Шкоп, камераман Ян Меліш і стригач філму Франтїшек Крегенбіл. І філм М. Шкопа Іншы світы, котрый є тыж о Русиных, быв у Карловых Варах так істо оціненый у 2006 роцї, а то Окремов цінов і Цінов позерателїв денника Право.

• Гамлет од Дядю – у войводиньскій телевізії

  7. юла 2009 в штудію Дунай скінчіло ся награваня найновшой премєры Русиньского народного театру Петро Ризніч Дядя в Руськім Керестурї (Сербія), а то гры Гамлет у пікатній омачцї автора Алла Ньколая і режісера Владиміра Надя Ачіма. Тоту гру в телевізній верзії режіровав Лазар Бркіч, а то про Редакцію проґрамів в русиньскім языку Телевізії Войводины.

• Влада Сербії схвалила Закон о радах народностных меншын

  2. юла 2009 на громадї Влады Серьбской републікы была схвалена пропозіція Закона о народных радах народностных меншын, котра теперь ся дістане на засїданя републікового парламенту. Як підкреслив міністер про людьскы права і права меншын, Светозар Чіпліч, зо схвалїнём пропозіції того закона суть конечно ясно дефінованы уставны права націоналных меншын і схвалена процедура конштітуованя народных рад народностных меншын, їх компетенцій, фінанцованя і маєтку.

• Підвігорлатьскый фестівал – успішный

  27. і 28. юна 2009 в рекреачній области Сниньскы рыбникы быв Підвігорлатьскый фестівал названый Під Бескидом зелененькым. Тот фестівал быв далшов із актівіт Пілотного проєкту приятельства на выходній граніцї, котрый є сполуфінанцованый із норьского фінанчного фонду, зо штатного роспочту СР а з фінанцій Міністерства културы СР. У рамках фестівалу успішно выступили: співацька ґрупа Дуга, фоклорны колектівы Сатаринчанка і Ублянка, збогачінём было выступлїня дівочого тріа зо Снины і дуа з Ужгороду, фоклорного ансамблю Барвінок із Самбора на Підкарпатю. В недїлю выступили зо словацькой стороны ансамблї: Шінява зо Снины, Врановчан із Вранова над Топлёв а з україньского боку – колектівы з Хусту, Самбора і Ужгорода, але тыж ансамблї зо Сербії і Польска.