Новинкы • Noviny • News 49/2010

• Чітайте книжкы в русиньскім языку

  Перед рождественныма святами як дарункы ся часто купують книжкы. В Пряшові мож купити і публікації в русиньскім языку.

• На 6. річнику Пoезії в містї – і Русины

  3. децембра 2010 у выставных просторах Містьского центра културы в Гуменнім была вернісаж выставкы фотоґрафії і поезії під назвом Поезія в містї, котру приправила Вігорлатьска книжніця, Основна умелецька школа і споминаный центер у Гуменнім i де ся презентують і Русины: Д. Капралёва, О. Лаурускый, М. Демян, А. Вархолова і іншы.

• Семінарь з міджінароднов участёв

  2. децембра 2010 Інштітут русиньского языка і културы Пряшівской універзіты в Пряшові (ІРЯК ПУ) вєдно зо Сполком русиньскых писателїв Словеньска зорґанізовав научный семінарь з міджінароднов участёв. Семінарь быв на тему Русиньскый списовный язык на Словеньску і сучасна русиньска література.

• О русиньскім школстві і културї

  25. новембра 2010 у засїдалнї пряшівского русиньского музею приправило Русиньске културно-освітне общество А. Духновіча у сполупраці з СНМ – Музеём русиньской културы в Пряшові одборный семінарь Русиньске школство, култура і освіта на Словеньску в роках 1919 – 1950, став проблематікы і вызнам про сучасный розвой културы в СР.

• 11. семінарь карпаторусиністікы

  24. новембра 2010 ся одбыв уж 11. Научный семінарь карпаторусиністікы, котрый реґуларно орґанізує Інштітут русиньского языка і културы Пряшівской універзіты (ПУ) в Пряшові. Семінарь на тему Етнічно-културны контакты Лемків/Русинів з обидвох боків Карпат. Дакілько позначок к етнолоґічному баданю міджі Русинами на Словакії быв у засїдалнї ректорату ПУ. На уведжену тему выступив докторанд Інштітуту етнолоґії і културной антрополоґії Універзіты Адама Міцкєвіча в Познаню (Польско) Мґр. Себастіан Дубєл-Дмитришин.

• Русины на конференції в Братїславі

  24. нoвeмбра 2010 в засїдалнї готела „Буорік“ у Братїславі прошла міджінародна конференція під назвов Язык і ідентічность – права народностных меншын у нас і в Европі. Oрґанізатором конференції быв Уряд підпредседы влады СР про людьскы права і народностны меншыны на челї з Рудолфом Хмелом, котрый на тій акції взяв пряму участь. За Русинів ту выступили: Др. Іван Бандуріч і ЮДр. Петро Крайняк.