19. новембра 2011 прошла в просторах кавярнї Републіка Жіжков у Празї установча стрїча нововытвореного здружіня Rusíni.cz – rusínská iniciativa v ČR. Здружіня хоче возьєдиняти Русинів, котры жыють в Чеській републіцї, но і сімпатізантів, котры ся Русинами або русинством інтересують.
По офіціалным зачатку стрїчі были представлены члены приправного выбору здружіня, а тыж становы здружіня. Притомны были інформованы о планованім діятельстві і цїлях здружіня. Здружіня хоче розвинути роботу в сферї комунітного жывота Русинів у ЧР, але ай інформовати чеську сполочность о Русинах, їх історії, културї і природных красах реґіону, де Русины жыють. Планує ся і сполупраца з далшыма орґанізаціями на внутроштатній і міждінародній уровни. На установчій стрїчі были схвалены становы здружіня і выбор здружіня. Председом здружіня ся став Петро Дерцо. Контролором здружіня быв зволен Петро Чулак.
В децембрї здружіня приправило ДВД проєкцію о медіално знамых Русинах. Далша акція ся планує на Сілвестра подля юліяньского календаря – 13.1.2012. На зачатку року буде і далшый річник Русиньского плесу в Празї.
Вецей інформацій о роботї здружіня найдете сі на вебовій сторінцї www.rusini.cz або напиште на і-майл info@rusini.cz.