25. октобра 2010 Інштітут русиньского языка і културы Пряшівской універзіты в Пряшові навщівила ґрупа 15 норьскых перекладателїв на челї з Евов Добош з універзіты в главнім містї Норьска – Осло.
Тоту ґрупу привітала директорка інштітуту доц. ПгДр. Анна Плїшкова, ПгД., котра потім інформовала гостей о історії, културї, языку і літературї Русинів, як і діятельности інштітуту і навчаню русиньского языка . Указала їм дакотры загранічны выданя о Русинах і русиньскім языку, русиньскы учебникы, приклады научно-популарных выдань і красной літературы. На конець по святочнім обідї за приятя і новы інформації подяковала А. Плїшковій председкыня Союзу норьскых перекладателїв, Сесілія Вінґер.