18. новембра 2010 у засїдалнї пріматора была стріча пріматора Пряшова ЮДр. Павла Гадярія і правнічкы Містького уряду в Пряшові ЮДр. Людмілы Варґовой із русиньскыма актівістами, котры суть заінтересованы в кавзі Руськый дім: Мґр. Гавриілом Бескидом, Мґр. Александром Зозуляком і Федором Віцом, якы заступали різны русиньскы орґанізації (Русиньске културно-освітне общество А. Духновіча в Пряшові, Словеньску асоціацію русиньскых орґанізації, Містьску орґанізацію в Пряшові Русиньской оброды на Словенську).
Розговор ся вів у конштруктівнім дусї і ёго цілём было інформовати поріматора якый є сучасный став кавзы і порадити ся як мож найти выход, жебы тота кавза была успішно закінчена на хосен вшыткых Русинів Словеньска, нелем ґрупочкы людей (трёх членів справной рады Надації Руськый клуб – 1923, справцю і ёго учтовнічкы).