25. – 26. юла 2009 у Музею лемківской културы в русиньскім селї Зіндранова (Польско) было каждорічне свято лемківской културы під назвов Од Русаля до Яна. Першый день участници свята положыль квіткы почливости на памятны місця, потім попозерали експозіцію музею і день ся скінчів стрічов при ватрї. Другый день зачав ся Святов літурґіов, по котрій быв главный проґрам свята – выступлїня як домашнїх фолклорных колектівів: Лемківскый перстеник із Ґладышова, Терка з Вілхівця, Вилшня, Роґовіце з Роґова, Ославяне з Мокрого, Відимо зо Санока, так і гостюючіх колектівів: На драбинї з Україны, Тон із Міджілаборець і Маковиця зо Свідника. Почас свята ёго участници зась могли попозерати експозіцію музею, народны ремесла а дїти ся могли запоїти до приправленых інтересных сутяжей.
Скінчіло ся далше свято, котре уж десятьроча приправуює ёго главный орґанізатор, закладатель і душа Музею лемківской културы в Зіндрановій – Теодор Ґоч, котрый 28. юна 2009 славив свої 80. народенины.