15. марца 2011 у Свіднику была вырочна громада Словеньской асоціації русиньскых орґанізацій (конкретно – Окресной орґанізації Русинской оброды у Свiднику). Нашым новым председом ся став Мґр. Мілош Стрончек. На членскій громадї сьме часточнї высвітлёвали причіны нашой участї в РОС і в САРО. Нашыма членами суть і представителї незісковой орґанізації Русинске центрум у Свиднику, котре я закладав як самостатный правный субєкт про молодых Свідничанів. Тепер є ёго директором Д. Брудняк.

РЦ, н.о. у Свіднику є колектівным членом РОС. Также мы і председа ОО РО у Свіднику Мґр. Мілош Стрончек, котрый є членом РЦ, н. о. сьме власнї членами РОС а можеме РОС репрезентувати. О нашім правнім поставіню в русинскім русї дашто сьме уж публіковали в окресных новинках. Але і так не было спомянуто о інтріґах і о порушіню членскых прав сучасным веджінём РОС. Хочу зато тым способом припомянути членам РОС, жебы памятали, же в ОО РО у Свиднику теперь мать за собов 18-річну екзістенцію і 57 реґіструваных членів, бо пан Крайковіч в новинках твердив, же сьме лем троє, то неправда!!! Даколи сьме мали ай 120 членів, дакотры уж ту не суть, дакотры одышли добровольнї з орґанізації, але дакотрых сьме выкреслили з евіденції, бо ся по выписанї приглашкы нияк не анґажували. Наша ОО РО у Свіднику все была орґанізація з правнов субєктівітов, преснї так, як ОО у Бардеёві. У Свіднику сьме мали свій рахунок у банцї. Жадне волене веджіня РОС не было, бо в Прешові В. Турок і А. Зозуляк нас рядили лем з позіції власной авторіти лідрів народного руху, мы їх авторіту добровольнї решпектували. Таку велику авторіту на Словенску уж по них не мав нихто. В Пряшові была лем редакція НН і Русин із самостатным рахунком а тот рядив А. Зозуляк, котрый был шефредактором.То мы, окресны орґанізації РОС Свідник, Бардеёв, Гуменне, Кошыцї сьме вытворили офіціалне веджіня РОС із условієм, же буде в Становах РОС захована правна субєктівіта нашых окресных орґанізацій. Становы выробив А. Зозуляк, бо быв таёмником РОС, подля нашых пожадавок а тото решпектовав Василь Турок і вшыткы председове РОС, окрім пана В. Прортивняка, котрый втогды міджі ведучіма ани не фіґуров (своїма выступлїнями ся презентую лем послїднї рокы). Тото треба памятати. Не треба забыти, же пан Противняк як єдиный председа РОС, порушыв нашы права. Зато фурт тверджу, же 10-ый Сейм РОС у Бардеёві порушыв людскы права закладаючіх членів РОС. То ся стало так, же на нечекану пропозіцію Мірослава Кереканіча, аж на самотнім Сеймі свойвольнї учасниці Сейму вымазали зо штруктуры Станов окресны орґанізації РОС. Тото ся перше мало дати проїднати на окресных членскых сходзках. Бо ОО РОС были і суть самостатны правны субєкты уж од заложіня веджіня РОС. А єм собі істый, же пропозіція на ліквідацію ОО РОС бы сьме в окресах змели зо стола. Кереканіч а спол. собі можно тот факт усвідомлёвали а зато приправили тайно пуч. І Мирон Крайковіч о тім пучі знав а нам у Свіднику замернї ніч не повів. Я на порушіня нашых прав у РОС упозорнёвав. Зато, же єм на порушіня нашой догоды о захованю правной субєктівіты про закладаючі окресны орґанізації упозорнёвав КВ РОС і Дозорну раду РОС, цітував єм і законы, а кідь панове з РОС затовкали правду і твердили, без огляду на законы, лем собі самі думали, же то так має быти, відїв єм, же у веджіню РОС є велика корупція, так єм ся обернув на Світовый конґрес Русинів. Подля мене, дахто в РОС слїдує свої обходны і моценьскы інтересы, а так може і нехотячі вытворять простор про дештрукцію русинского народного руху на Словенску. Наприклад, ішло о продач културных проґрамів давно перед 10-ым Сеймом РОС. О тот проґрам я у Свідницькім окресї, Іван Бандуріч в Бардеёвскім окресї і Штефан Зима у Старолюбовньнскім окресї сьме не проявили інтерес, бо мали сьме інтерес підпоровати културны проґрамы нашых окресных фолклорных колектівів. А думам собі, же тот пуч на 10-ім Сеймі мала быти помста за наш одпор. Дакому требало здобыти приступ на торг із фоклором у нашых селах. Так ся зробила інтріґа і пуч на 10-ім Сеймі. „Účel svieti prostriedky“ – так ся повідать на вшелиякы подводы. На права субєктівіты обчаньскых здружінь нихто на 10-ім Сеймі РОС не брав огляд. Ішло о бізніс. Прото причіна была наша ліквідація за помочі насиля і безоглядности а так ся хотїли достати на торг на нашы села. Высліїком того насиля суть на Словенску розброї і розкол у поглядах в русиньскых обчанскых здружінях. Зато мы сьме уж в САРО, Штефана Зиму в С. Любовнї одставили на другу коляй і ОО РО розбили, а Івана Бандуріча теперь ламуть на колїнї, найвеце ся в тім напрямі анґажує, удайнї, пан Кереканіч. Він бы з того асі наісто мав найвкшый хосен, кібы овладнув окрес Бардеёв.Треба ся нам злучовати, але на першім місцї мусить быти узнане право на охрану чоловіка і обчанскых здружінь, бо самі ведеме бой за права Русинів на Українї. Як мы самы не будеме решпектовати людскы права, так ся з РОС може стати русинска концертна облуда про бізнісовы інтересы про корупцію заложену на штатных фондах із проєктів. Наприклад, наш власный свідницкый проєкт – Віфлеємскый вечур уж собі привласнив у РОС дахто другый. То є ясный прояв корупції в РОС. Розгоднї бы не было добрї, як бы сьме в РОС доволили донеконечна будовати корупчны одношіня на штатных проєктах. Людскы права треба поважувати за важный проблем, котрый на 11-ім Сеймі РОС треба вырїшыти і направити кривды способлены сучасныма „воджатаями“ РОС на 10-ім Сеймі РОС. Зато треба досягнути зміну думаня і на найвысшых постох в РОС. Але ці ся то подарить?!