26. септембра 2010 было незабытне поетічне пообідя в Културнім центрї Южан у Кошіцях, яке зорґанізовала Містна орґанізація Русиньской оброды в Кошіцях і в рамках якого выступив тогорічный лавреат Премії Александра Духновіча за русиньску літературу і Премії Александра Павловіча од Словацького літературного фонду, автор духовной поезії, байкарь і перекладатель церьковных текстів із церьковнославяньского языка до русиньского – Осиф Кудзей з Няґова (окрес Міджілабірцї).
Він є і тогорічным найпопуларнїшым писателём, якого в тайнім голосованю встановили декламаторы Духновічого Пряшова. Три зборникы баёк в роках 2009 і 2010 му выдала редакція Русин і Народны новинкы, а то Мудрость жывота, Байкы-забаляйкы і Байкарёвы думы, як і єден зборник духовной поезії під назвов Пацеркы. Позваный автор нелем росповів о своїй творчости, але і задекламовав з нёй. Акцію добре збогатили манжеле Серґей і Марія Сметанковы, дуо співаків С. Сметанка і Осиф Кость, як і дуо М. Сметанкова і Гелена Ґайдошова, якы заспівали пару русиньскых народных співанок і часть з Кудзеёвого Акафісту священомученикови, єпіскопови Павлови Петрови Ґойдічови. Притомны были барз спокійны з тым прекрасным пообідём і были позваны на деалшу акцію – концерт мужской співацькой ґрупы Поляна, якый быв 24. октобра 2010.