23. юл 2009. Піддукляньскый умелецькый народный ансамбель (ПУЛЬС) попутовав на міджінародный фестівал до міста Мартікез у Франції, де репрезентує Словакію, але главно Пряшівскый самосправный край.
Є то єден із найвекшых фолклорных фестівалів у тім реґіонї. „Місто Мартікез є на французскій рівєрї а главна сцена є прямо на морю. ПУЛЬС почас перебываня на нім дакілько раз выступить з проґрамом Очарены поглядом, котрый мав лем недавно свою премєру. Попритім ПУЛЬС мать і допроводны акції, як поход містом або школа танцю про участників фестівалу,“ інформовав манажер ПУЛЬС-у Осиф Михалчін.
Директор ансамблю Владимір Марушін повів, же затля є вшытко в порядку, хвиля є прекрасна, як і орґанізація фестівалу а о цілый 46-членный колектів ся старають барз добрї. Ансамбель верне ся на Словакію аж в авґустї.