26. фебруaра 2011 в Театрї Йонаша Заборьского в Пряшові одбыв ся юбілейный концерт Піддукляньского умелецького людового субору (ПУЛЬС). Концерт ся складав з двох частей. В першій части умелцї представили уривкы із найуспішнїшых проґрамів 55 років ёго діятельства. Другу часть творила презентація сучасных найуспішнїшых проґрамів.
Наш юбілант – Піддукляньскый умелецькый людовый субор, до року 1993 ся назвав Піддукляньскый україньскый народный ансамбль (ПУНА), в роках 1993 – 1996, в часї шефованя Владиміра Марушіна, то быв зaсь PULZ a 2 року то было танечне штудіо Театру Александра Духновіча в Пряшові. Teперь є самостатным професіоналным ансамблём в Театрї Йонаша Заборьского в Пряшові. Хоць за 55 років колектів мав різны назвы, але зробив величезну роботу на поли захованя, далшого розвиваня і пропаґації русиньского народного співу і танця, а то нелем дома, але і в різных країнах світа, в чім мать свою заслугу каждый тот, котрый в тім-котрім періодї вів ансамбель, мав там даяку функцію або быв лем рядовым членом. Ґратулуєме нашому юбілантови і желаме му, абы нас вшыткых тїшыв своїма красныма выступлїнями іщі много років.