12. юна 2010 каждый, кому не была легковажна судьба нашой отчізны почас далшых чотырёх років, взяв участь у вольбах до Народной рады Словеньской републікы. На Словеньску є 4 362 369 волічів, з чого 2 556 779 їх было на вольбах, што є 58, 83 %. Дале тыж кус штатістікы: до словеньского парламенту ся дістало 6 політічных партій, а то Смер – Соціална демократія (за них голосовало 880 111 волічів, што є 34, 79 % і тым здобыли 62 місць у парламентї), Партія демократічной коаліції – Демократічна партія (390 042 = 15, 42% = 28 місць), Слобода і солідарность (307 287 = 12, 14 % = 22 місць), Хрістіаньско-демократічный рух (215 755 = 8, 52 %, = 15 місць), Мост-Hid (205 538 = 8, 12 = 14 місць) і Словеньска народна партія (128 490 = 5, 07 % = 9 місць. Добрї ся запрезентовали дві новы партії (Слобода і солідарность і Мост-Hid), котры такой ся дістали до парламенту, в порівнаню з двома довгорічныма парламентныма партіями (Рух за демократічне Словеньско – Народна партія і Партія мадярьской коаліції) зістали перед ёго порогом.

Тілько вступна штатістіка а теперь пару думок, што буде дале. Председу вітязной партії і сучасного премєра Роберта Фіца презідент СР Іван Ґашпаровіч повірив зложыти нову владу СР до 23. юна 2010. Не знаме, ці ся му то подарить, бо єдиным партнером про ёго партію Смер – СД є лем Словеньска народна партія, яка але здобыла мало преференцій, а остатнї партії партії, якы ся до парламенту дістали, суть середнё-правого політічного спектра і высловили ся, же довкоаліції зо Смером – СД і ёго лідром, Р. Фіцом, не підуть. Р. Фіцо повів, же кідь до даного терміну ся му не подарить зложыти владу, піде до опозіції і, як сконштатовав, „ніч не буду насилно продовжовати“. Потім настане сітуація така, як в недавных вольбах до парламенту Чеськой републікы, же хоць выграла лївоорьєнтована партія, владу зосталює правоорьєнтована партія на челї з лідром найсилнїшой у вольбах правоорьєнтвованой партії, тот ся потім, як правило і стане новым премєром. У Чехії ся премєром став лідер Обчаньской демократічной партії Петер Нечас, якого як політіка без шкандалів і корупчной минулости называють паном „Чістым“. А таксамо назвали і потенціалну премєрку влады Словеньской републікы, Івету Радїчову – панї „Чіста“. Радїчовой минулость є без шкандалів і кідь зробила хыбу при голосованю у парламентї, на основі чого ся вздала мандату, што є незвычайный яв політічной културы у нас. „Премєрка? Лем то нїт.“ То были слова многых єй колеґів у партії, котры при голосованю за лідерку у вольбах были у тяжкій сітуації. Знали, же Радїчова може партію захранити перед волебным фіяском, сучасно але бояли ся того, жебы ся стала премєрков. Навинї мають быти дакотры неґатівны знакы єй характеру, котры обычайный чоловік з телевізных реалцій нїґда не може вычітати. „Є гістерічна і твердоголова. Не дасть ся з нёв сполупрацовати,“ говорять тоты, што з нёв сполупрацовали. Не знають собі представити як звладне фукцію премєркы зо своїма надмірныма емоціями, котры указовала главно у презідентьскій кампанї“. Говорить ся, же люде ростуть з функціями. Радїчова уж зачала рости, але як буде вести нашу країну штири рокы, то укаже час, кідь ся стане премєрков влады СР.

Также нас вшыткых што слїдуєме політічну сцену і цїлу сітуацію в нашій країнї, будуть барз інтересовати далшы важны рїшіня, далшы важны днї. Лем жебы то вшытко было на хосен векшыны жытелїв нашой отчізны, не лем малой ґрупы „выбраных“.