2. септембра 2010 на Міністерстві внутра СР в Братїславі была записана до реґістра партій нова партія Наш край. Подля слов єй ініціаторів головныма причінами про зроджіня того політічного субєкту є, же політічны партії, котры мають цілословеньску уровень, не понукають проґрам про розвиток северовыходного Словеньска і не хранять народностны інтересы єй жытелїв.
На додаток – приходить і час, жебы нова ґенерація нашла уплатнїня во верейнім жывотї. Партія Наш край хоче здобыти довіру людей уж в надходящіх новембровых комуналных вольбах. Представителї приправного выбору політічной партії Наш край – Александер Дулеба і Ян Ліпіньскый (підпредседа ЗІРС) подали на Міністерство внутра СР пропозіцію на реґістрацію партії Наша край. Найважнїшов частёв пропозіції, окрем штатуту партії, выголошіня о єй централї і заплачіня справного поплатку, были петічны листины з підписами жытелїв, котры ся згодують зо взником політічной той партії. „Мы предложыли спискы з підписами 12 300 жытелїв, што значіть, же сьме досправды перекрочіли граніцю 10 000 підписів, яку выжадую закон “, – повів такой по переданю пропозіції А. Дулеба. “Мам з того барз добре чутя, бо в юни 2010 сьме першый раз верейнї на сенімарї в Пряшові презентовали думку о взнику партії і екзістенції політічной партії з містным акцентом на реґіоналный розвиток северовыходного Словеньска. Днесь міцно вірю, же мы сповнили вшыткы релеватности, жебы така партія могла зачати реално ся реалізовати“, – додав А. Дулеба.
Адміністратівна процедура реґістрацію партії зачінать днём поданя пропозіції на реґістрацію політічной партії. Кідь пропозіція не мать недостаткы або не є причіна на єй одмітнутя, міністерство партію зареґіструє (запише до реґістра партій) до 15 днів од зачатя процедуры, што ся уж стало.
Теперь штатутарный орґан партії мусить быти зволеный до трёх місяцїв од взнику партії, што значіть, же трёме членове приправного выбору мусять скликати до того датуму установлюючій конґрес партії. Іщі додаваме, же партія Наш край буде мати свій центер у Пряшові.