5. септембра 2009 пришов Мілан Падяк із Ужгороду штудовати до Ґімназії Петра Кузмяка у Руськім Керестурї (Войводина в Сербії), котрый свої середнёшкольскы штудії передовжыть навчанём у русиньскім оддїлїню першой класы спомянутой ґімназії.
Пятнадцятьрічного Мілана Падяка до Руського Керестура привезли ёго родічі, Валерій і Лариса Падяковы, котрых, окрем директора школы Янка Хомы і выхователькы Любіцї Нярадіёвой, 7. септембра привітав і председа Народной рады Русинів, Славко Орос і председа Руской маткы і Світовой рады Русинів – Дюра Папуґа.
Отець першого загранічного школяря у спомянутій ґімназії є добрї знамый міджі Русинами, главно як председа Закарпатьского областного благонадійного фонду „Русиньска школа“, котрый на послїднїм засїданю Світового конґресу Русинів у Руськім Керестурї 2009 року быв приятый до той міджінародной орґанізації. Він є і властником Выдавательства В. Падяка і выдав уж много книжок в русиньскым зыку. Він, вєдно з іншыми орґанізаціями Русинів, є єдным із найвекшых пропаґаторів навчаня школярїв із Підкарпатя на Українї в керестурскій ґімназії, а тым, же приголосив свого ёдиного дїтвака до той школы, указав найлїпшый приклад про остатных родічів-Русинів на Підкарпатю, жебы го наслїдовали.
– Перед пару роками, дякуючі і Народній радї Русинів, зачали розговоры о можностях навчаня дїтей із Словакії і Україны у Руськім Керестурї. Школа, а самособов, і наша Народна рада, ся постарають о придїлїня штіпендії загранічным штудентам. Сьме способны забеспечити штіпендію і остатны дїла у звязи з перебыванём в інтернатів аж про пятёх загранічных штудентів, кібы была потреба. Вірю, же Мілан буде спокійный із середнёшкольскым жывотом у Керестурї, – повів директор школы Янко Хома.