Драматік, діріґент, але в першім рядї добрый композітор Штефан Ладіжіньскый у своїм прекраснім віцї 87 років, не є пасівным, але, наспак, актівным. Талентованый і скусеный умелець, котрому вдячіме передовшыткым за ёго тырвалый вклад до сакралной мизикы, послїднї рокы ся занимав главно літурґіёв св. Яна Златоустого. І так про хоры вытворив штириголос к літурґічным співам, якым дав книжну подобу під назвов Співы к літурґії св. Яна Златоустого.
Найновішыма приростками у світї сакралной музикы суть зборникы Богородице Дїво (маріаньскы піснї про мішаный і женьскый хоры) і Хрістос воскрес (великодны співа про мішаный хор). Обидва зборникы дістали вшыткы ґрекокатолицькы хоры на Словеньску. Наконець лем додам пожеланя, якым ся нам пригварять Штефан Ладижіньскый нелем як композітор, але главно як добрый приятель: „Най ся каждый наш спів стане красным цвітом на вівтарю каждого нашого свята.“